Edad ni Gullas isyu sa kaatbang

CEBU, Philippines – Edad ang bentaha ni Solomon “Pastor” Paypa batok ni Talisay City Mayor Eduardo Gullas sa ilang panag-atbang sa pagka-kongresista sunod eleksiyon.

Si Paypa nibutyag nga maglisud gyud siya sa political machinery batok ni Gullas apan ang iyang ka sinsero sa pagserbisyo mao gyud ang iyang ikapanghambog.

Gawas pa niana, iyang gihimug-atan nga mas baskog ug lagsik pa siya karon kaysa beteranong Gullas.

Si Paypa 72-anyos samtang si Gullas nagpangedaron na og 88-anyos.

Gisuwayan sa pagkuha og habig si Gullas apan wala kini sa iyang buhatan.

Si Paypa, Gullas ug si Rodulfo Flormata maoy magpapili sa pagka-kongresista sa unang distrito sa Lalawigan sa Sugbo.

Gani kagahapon sab unta ang ilang panagtagbo ni Kongresista Gwendolyn Garcia apan kini naoktaba.

Nitumaw hinuon ang estorya nga namulso pa si Gullas kun asa gyud musuporta sa pagka-gobernador.

Apan si Kongresista Gerald Anthony “Samsam” Gullas niklaro nga naa sila kang Garcia mosuporta.

Wala madayon ang ilang panagtagbo kang Garcia tungod kay aduna may unang appointment ang iyang apohan nga mayor. (/GMR)(BANAT NEWS)