Mga babaye apil sa nasikop sa buy-bust

CEBU, Philippines — Nasikop sa managlahing buy-bust operation sa Lapu-Lapu City Police Office (LLCPO) ug kapolisan sa Lungsod sa Cordova ang unom ka pusher.

Si Senior Inspector Efren Diaz Jr., hepe sa Cordova Police Station, niila sa mga nadakpan nga sila si Daniel Dico Bentulan, 21; Jundrel Muñasque, 31, ug Marissa Ansubog Jimenez, 29, pulos taga Sitio Bliss, Barangay Ibabao. Nasakmit nga mga ebidensiya naglakip sa 14 ka gagmay nga pakete sa shabu ug P300 nga marked money. Laing nasikop sa maong lugar sila si Arthur Marzan, 45, ug June Carl Bentulan, ulitawo, pulos nalakip sa watch list, ug Reymart Maghanoy, 21, bag-o lang naila nga nalambigit sa ilegal nga drugas.

Nasakmit gikan sa mga dinakpan ang mga pinutos nga ginadiling drugas nga motimbang og 7.53 gramos nga mobalor og P89 mil, armas ug bala. Samtang nadakpan sab sa mga sakop sa City Intelligence Branch (CIB) sa Lapu-Lapu City Police Office, ang tulo ka pusher sa Purok Kapayas, Barangay Canjulao diin naglakip sa usa ka babaye.

Si Police Chief Inspector Jaime Tolentino sa CIB-LLCPO niila sa nadakpan nga sila si Saligo Liwag Jumao-as, 58; Diane Berdin Dimson, 40; Maria Princess Sophia Dungog Tantoco, 39, ug Manny Augusto Malingin, 21, nagpuyo sa maong dapit.

Nasakmit gikan sa mga dinakpan ang 60 ka gagmay nga pakete sa shabu, P550 nga buy-bust money ug P500 nga gituohang halin sa ilegal nga drugas. Sa laing bahin, magkapuyo nga durugista ang nadakpan sa buy-bust operation sa Susana Compound, Molave, Barangay Tabunok, Dakbayan sa Talisay kagahapon sa kaadlawon.

Ang mga dinakpan mao sila si Jomar Panilagao, 47, ug iyang kapuyo nga si Jocelyn Doble, 32, kinsa nakuhaan og lima ka medium ug 32 ka gagmay nga pakete sa shabu nga nitimbang og 26.28 gramos nga mobalor P320,104. Nakuha sab ang lima ka tag P500 nga gituohang halin ug mga kagamitan sa pag-repack sa ilegal nga drugas. (Rowena D. Capistrano ug Gabriel C. Bonjoc/GMR)(BANATNEWS)