Foreshore land bawion sa Mandaue
CEBU, Philippines — Giaprohan sa konseho sa Dakbayan sa Mandaue ang rekomendasyon sa legal office sa siyudad sa pag-nullify sa pagbaligya sa 35,821 square meters nga foreshore land nga nahimutang diha sa Barangay Looc ingon man ang pagbawi niini.
Kini ang gikompirmar ni Bise Mayor Carlo Fortuna kinsa nahinabi sa mga tigbalita sa niaging adlaw.
Ang maong luna nga gipanag-iya sa kagamhanan sa siyudad ang nabaligya ubos kaniadto sa administrasyon ni mayor ug karon Kongresista Jonas Cortes ngadto sa pribadong kompaniya nga E.C. Ouano Development and Management Corporation (Ecodemcor) sa kantidad nga P1, 791,050 o P50 ang matag metro kwadrado niadtong tuig 2015.
Nahimong init karon nga isyu ang pagbaligya sa maong luna tungod usab sa pagsang-at og reklamo nila ni Abner Quiño ug Emmanuel Espirito, II kinsa nialigar sa ilang giduso nga reklamo ngadto sa buhatan sa Ombudsman nga naalkanse ang dakbayan og dili mo menos sa P428 milyones.
Ang maong pasangil gihimakak ni Cortes ug nagkanayon kini nga daghang mogawas nga isyu panahon sa eleksiyon. (/BDB)(BANATNEWS)
- Latest