PPA nitiyabaw kay mga kasa nagtipun-og

CEBU, Philippines – Nagkuwang karon og mga volunteers ang Parole and Probation Administration ubos sa Department of Justice tungod sa kadaghan sa mga prisong nalambigit sa ilegal nga drugas nga ni- apply sa plea bargaining agreement.

Matud pa ni Christine Javier, Supervising Probation and Parole, aduna silay 420 ka mga kasong gipasubay sa kanila sa korte  kon angayan ba silang hatagan og probation o parole subay sa plea bargain agreement.

Ang 268 niini mga drug cases apan tungod sa kadaghan niini ug sa kamubo sa mga adlaw (60) nga gihatag kanila sa korte paghimo og imbestigasyon ug  tagsatagsahon pagsusi ang mga kaso, nagkuwang gyud sila og tawo.

Niabot na og 200 kapin ang ilang nahuman ug nahimoan og rekomendasyon apan padayon ang pagabot-abot sa mga bag-ong kaso diha sa ilang buhatan.

Kadtong interesadong mag volunteer aron motabang kanila kinahanglan nag-edad 35 pataas, walay criminal records ug makapasar sa ilang back ground investigation. Iyang giklaro nga wala kini sweldo.

Si Clark Niño Cagijas, ang Chief Probation sa PPA nitug-an nga aduna silay ipahigayon nga round table discussion kauban sa mga stakeholders, huwes, ug uban pa karong Oktobre 24 sa Cebu ug Oktobre 26 sa Bohol aron paghimo og pamaagi nga masulbad kini. (/IBM)(BANAT NEWS)