4 kandidatong mayor sa LLC; 3 kandidatong PB sa 6th district

CEBU, Philippines – Gikatakda nga mosumitir sa ilang certificate of candidacy ang mga kandidato sa Dakbayan sa Lapu-Lapu ngadto sa buhatan sa Commission on Election (Comelec) nga naglakip na niini ang kompletong lineup ni kanhi Kongresista Arturo Boy Radaza.

Gikataho nga ang tandem ni kanhi Kongresista Radaza ang iyang pag-umangkon nga si Konsehal Harry Don Radaza tungod kay si Mayor Paz Radaza nga anaa na sa iyang kataposang termino ang magpapili sa pagkakongresista sa Lone District sa siyudad.

Nunot sa pagsumitir sa ilang COC gipaabot ang panagsakbang sa upat ka kandidato alang sa pagkamayor, upat sa pagkabise mayor ug 10 ka sakop sa konseho sa matag lineup niini.

Naglakip sa lineup nga magsakbang sa 2019 midterm election mao ang lineup ni Pajo Barangay Kapitan Jonard Ahong Chan kinsa nipahibalo nga si Dr. Celedoño Sitoy maoy  magbise mayor.

Ang lineup ni Chan ubos kini sa PDP Laban,  Lakas  Kampi  mao usab sila si Radaza  samtang si Engineer Rolando Patalinjug ang kandidato ubos sa Unites Nationalist Alliance  (UNA) ug kandidato nga independente  ang 57 -anyos nga si Virgilio dela Cerna Cano.  Sa laing bahin, posibleng tulo ka kandito isip pagkabokal ang magsakbang sa 6th district sa sunod tuig nga eleksiyon.

Naglakip  sa mag-ilog  sa duha ka pwesto sa hunta probinsiyal sa Lalawigan sa Sugbo mao sila si incumbent 6th  district  Board Member Jonkie Ouano nga magpasubli sa iyang ikaduhang termino.

Mahimo niyang kailog ang magpapatigayon nga si Glenn Soco ug Dr. Paulus Mariae Cañete kinsa gikatakdang moduso sa iyang COC karong adlawa. (/BDB)(BANAT NEWS)