‘State of lawlessness’ gihimakak sa PRO-7
CEBU, Philippines — Padayong gihimakak ni Police Regional Office 7 director, Chief Supt. Debold Sinas, nga anaa na sa state of lawlessness ang Sugbo base sa giingon sa mga negosyante.
Matud ni Sinas nga wala kini nahisguti dihang nakahinabi niya ang business sector.
“You define lawlessness, you define lawlessness please, we are talking with them. I don’t think nga nabalaka sila because wala may gipatay diri nga outright,” nagkanayon ang heneral.
“We are supported by businessmen, raising P1-million for our policemen with pending cases,” dugang ni Sinas. Giingong naalarma ang business community sa kapakyas sa mga awtoridad sa pagdumala sa peace and order sa Sugbo.
Kini human dali nga nisaka ngadto sa 47 ang patay sa Sugbo sulod lang sa tulo ka semana gikan niadtong Septiyembre 26 hangtud Oktubre 12 diin ang grupo ni PO3 Micahel Santinno Cortes gibanhigan ug napagan ang 50-anyos nga mamasurahay sa Sitio Ranger, Pooc, Dakbayan sa Talisay.
Sa laing bahin niingon si Sinas nga andam silang mangatubang sa Senado kabahin sa giingong pagtaas sa kasong pagpatay sa Sugbo.
Mangayo sila og guidance ni PNP Chief Oscar Albayalde isip courtesy.
Apan giklaro ni Sinas nga hangtud karon wala pa silay nadawat nga imbitasyon alang sa maong Senate inquiry.
Naalarma ang pipila ka senador ilabi na sa nahitabo sa bukirang Barangay Malubog sa Dakbayan sa Sugbo diin lima ang gipamusil patay ug duha ang nakalingkawas.
Si Sinas padayong nihimakak nga may kalabutan ang kapolisan sa maong pagpatay.
“Again we deny that we are involved. Si Charmaine (Puran) tua sa CHR, and kato usa ka habal-habal driver naimbestigahan wala siya moestorya na polis gyud,” si Sinas nagkanayon.
Matud ni Senior Supt. Royina Garma, direktor sa Cebu City Police Office, nga base sa giluwatan nga affidavit sa ikaduhang survivor nga si Antonio Belande walay nakabutang nga polis gyud ang nagpaluyo sa krimen. -/GMR (BANAT NEWS)
- Latest
