Koreans luwas ra sa sugbo

CEBU, Philippines — Masaligon si Korean Consul General Oh Young Hun sa seguridad sa mga Koreano sa Sugbo taliwa sa pagtaas sa kasong pagpatay hinungdan nga taas gihapon ang ilang pagsalig ug suporta sa kapolisan.

Giingon wala maapektuhi ang pagdagsa sa mga turistang Koreano sa Sugbo.

Matud ni Oh nga nakita nila ang kadasig sa kapolisan ilabi na niadtong nasulbad sa Cebu City Police Office ang kasong pagpatay sa Korean nga si Young Ho Lee, 20-anyos, kinsa gipusil patay sulod sa usa ka motel sa Barangay Mabolo niadtong Agosto 26.

Septiyembre 12 gidakop pinasikad sa warrant of arrest niadtong Miyerkules sa gabii sa usa ka hostel sa Barangay Lahug ang usa ka Jessie Casado alyas Kano kinsa gitumbok nga nipatay sa langyaw.

Kagahapon nibisita sa Police Regional Office-7 ang Consul aron pormal nga i-turnover ang gidonar nila nga 25 kabuok sakyanan nga gamitong patrol cars sa kapolisan sa Metro Cebu.

Butyag niini nga karong tuiga pun-an na sab nila ang donasyon og 140 kabuok nga motorsiklo alang sa mga estasyonan sa polis.

Plano sab nila nga ipaubos ang pipila ka imbestigador og training ug mohatag pa gyud sila og investigation kits sa kapolisan sa PRO-7.

“Thank you very much, rest assured that the Police Regional Office-7 will continue to help protect the Korean tourists and Korean communities here,” sigun pa ni Chief Supt. Debold Sinas, direktor sa PRO-7.

Dugang sa heneral nga gikatakda silang makighinabi sa mga Korean communities sa Sugbo aron hisgutan ang security niini. (BANAT NEWS)