Asawa ni Salimbangon, Shimura niduso na sa COC

CEBU, Philippines — Ang asawa ni Kongresista Benhur Salimbangon ug Bokal Sun Shimura ang mopuli sa tagsatagsa nila ka pwesto sa piniliay sunod tuig. Sila si Janice Salimbangon ug Kerrie Keane Shimura ang dungan nga nisang-at sa ilang certificate of candidacy (COC) sa buhatan sa Commission on Elections sa Kapitolyo kagahapon.

Si Janice ang magpapili sa pagkakongresista samtang si Kerrie magpapili sa pagkasakop sa Provincial Board sa ikaupat nga distrito sa Lalawigan sa Sugbo.

Matud ni Benhur nga buot niyang mapadayon ang wala pa nahuman nga mga proyekto sa distrito maong nagtuo siya nga pinaagi sa iyang kapikas mapadayon kini.

Usa niini ang paghingusog nga mahimong eco-tourism destination ug economic zone ang ikaupat nga distrito diin sa pagkakaron giandam na ang mga gikinahanglang inprastraktura sama sa lapad nga mga dalan, mga pantalan, tugpahanan, elektrisidad ug uban pa.

Nahimong upat ka termino ang nasilbihan ni Benhur human nainbalido ang una niyang termino nunot sa protesta sa iyang kaatbang nga si kanhi Bogo mayor ug karon Bokal Celestino Martinez, III.

Mas gipili ni Benhur nga dili magpapili sa bisan unsang posisyon sunod eleksiyon aron iyang maabagan si Janice.

Sama usab ang tinguha ni Kerrie nga mapadayon ang serbisyo ni Sun sa distrito samtang kini magpapili sa pagkamayor sa Lungsod sa Daanbantayan ubos sa National Unity Party (NUP) ug One Cebu. (BANAT NEWS)