BOPK nakaduso na sa COC

CEBU, Philippines — Duha ka adlaw human nila gipahibawo sa publiko ang ilang line-up, nakasang-at na sa ilang certificate of candidacy ang mga magpapili sa Bando Osmeña Pundok Kauswagan (BOPK) sa Dakbayan sa Sugbo.

Kagahapon nisang-at sa ilang COC ang BOPK diin giunhan kini sa Santos nga Misa sa San Pedro Calungsod Chapel.

Nagpunsisok gawas sa buhatan sa Commission on Elections ang mga dumadapig sa BOPK.

Subling magpapili si Mayor Tomas Osmeña kauban ni Konsehal Mary Ann de los Santos isip bise-mayor.

Magpasubli sab sila si Kongresista Rodrigo Abellanosa ug Kongresista Raul del Mar.

Ang mga konsehal sa South District mao sila si Rengelle Pelayo, Atty. Kirk Bryan Repollo, Atty. Marie Velle Abella, Konsehal Dave Tumulak, Eugenio Gabuya Jr., Roberto Cabarrubias, Raul Alcoseba ug Michael Gacasan.

Sa North District mao sila si Konsehal Jerry Guardo, Sisinio Andales, Joy Augustus Young, Alvin Arcilla, Dr. Marlo Maamo, Alvin Dizon, Nestor Archival ug Lea Japson.

Nagkanayon si Mayor Osmeña nga ang nakalahi sa ilang pag-file kagahapon mao nga si Konsehal Margarita Osmeña nga iyang kapikas dili na kandidato sanglit moretiro na man kini sa politika.

“So the way I look at it the score in any elections is always starts zero-zero but we have the two bailiwicks already and I’m making Michael Gacasan the Barangay Captain of Guadalupe a candidate for councilor as my way of saying thank you because I will tell you that not even Tony Cuenco will win in Guadalupe and I don’t anyone can win in Guadalupe, we’re going to hold it tight and then the battle will start the rest,” sigun ni Osmeña.

Samtang wala nabalaka ang BOPK nga ang ilang kontra dunay kontra nga artista sa kaulohan.

Ang aktor nga si Richard Yap maoy ikaatbang ni del Mar sa North District ug asoy sa kongresista nga bisan kinsa mahimong makadagan ug ila kining gipangandaman.

Samtang gipaabot nga karong adlawa mosang-at sa iyang COC si Tumulak kinsa wala kadungan kagahapon gumikan kay wala pa ang iyang Certificate of Nomination and Acceptance (CONA) gikan sa Nacionalista Party nga gipirmahan ni kanhi Senador Manny Villar isip presidente sa partido.

Si Comelec Cebu City North District Election Officer, Atty. Marchel Sarno, niingon nga kadtong nakasang-at na sa ilang COC dili pa makonsiderar nga kandidato hangtud sa pagsugod na sa campaign period.

“Dili siya illegal kay gi-consider man sa balaud nga wala na tay premature campaigning, ma-consider ra sila nga kandidato at the start sa campaign period so any advertisement seguro or publication in favor sa ilaha or promoting sa ilahang kaugalingon cannot be considered as campaign under sa atong present nga balaud karon,” pasabot ni Sarno.

Samtang ugma gikatakda sab nga mosang-at sa ilang COC ang mga kandidato sa Barug Partido Demokratiko Pilipino-Lakas ng Bayan (Barug PDP-Laban) nga pangulohan ni Bise Mayor Edgar Labella sa pagka-mayor ug Rama sa pagka-bise mayor. (BANAT NEWS)