Cortes mao ang naa sa narco-list

CEBU, Philippines — Polis nga napatay sa ambush sa Talisay City sa miaging semana giingong level 2 drug personality sumala pa ni Police Regional Office-7 director Chief Supt. Debold Sinas.

Matud pa ni Sinas  nga si PO3 Micahel Santinno Cortes base sa ilang monitoring mao gyud ang polis nga anaa sa narco-list ni Presidente Rodrigo Duterte nga gipagawas niadtong tuig 2016 bisan pa og PO2 Michael Cortez ang naa sa maong listahan.

"Despite being in the list, padayon gihapon. Dili ka basta-basta mabutang sa lista if walay basis," sumala sa maong heneral.

Ang PO2 Cortez nga naa sa listahan nadestino sa Barili, samtang si PO3 Cortes nga napatay sa ambush nadestino kaniadto sa maong lungsod sa dihang gipagawas ang maong listahan, una pa siya gibalhin sa PRO-ARMM ug didto gibutang sa Jolo.

"He is one of the few policemen nga identified and gipahawa because of their involvement (sa drugs)," si Sinas nagkanayon atol sa press conference kagahapon.

Si Sinas miingon nga nagtukod og iyang network si Cortes sa Dakbayan sa Talisay aron maprotektahan ang iyang distribusyon sa drugas.

"Tapos nag-organize siya ng kaugalingon network. PO3 pa rank niya pero naa siyay escort, he is not assigned here. He organized his own network there (Talisay City). Natandog namo ang network and sila-sila na lang ang nag-away.

Some of our policemen already received threats. Wala lang namo gipagawas," si Sinas miingon.

Matud pa ni Sinas ang kasagarang madakpan nila nga drug pushers  sa Talisay motug-an nga si Cortes maoy ilang tinubdan sa drugas.

Butyag sa maong heneral nga base sa ilang pakig-alayon sa kadagkoan sa PRO-ARMM nasuta nga tagsa ra mo-report didto si Cortes ug pirmeng mopasumangil nga aduna kini court hearing diri sa Sugbo.

Nasayran nga gikan sa hearing didto sa Barili si Cortes kauban ang iyang drayber nga si Dennis  Patiluna ug Jose Soroño, sakay sa SUV Sorento ni Cortes nga adunay plakang JDU-934.

Pag-abot sa Sitio Ranger, Barangay Pooc, gibakbakan sila sa mga lalaking giingong armado og mga tag-as nga kalibre sa armas. Napatay silang tulo apan napagan ug napatay usab ang 50 anyos nga mamasurahay kinsa  naagi lang sa maong lugar.

Si Sinas misaad nga mohatag og tabang pinansyal ang kapolisan sa nabiyaang pamilya sa mamasurahay nga si Cresencia Ranghus.

Hangtud karon, blangko gihapon ang kapolisan sa pag-ila sa utok sa maong pagpamanhig patay kang Cortes ug sa mga kaubanan niini. (BANAT NEWS)