Mga kandidato sa PDP-Laban sa probinsya gipaila
CEBU, Philippines — Pormal na nga gipaila kagahapon ang mga mokandidato sa Sugbo ubos sa bandera sa PDP-Laban ang partido sa administrasyon karon.
Gihatag na ngadto sa mga kandidato ang Certificate of Nomination and Acceptance (CONA) gikan sa maong partido. Ang maong dokumento kabahin sa rekisitos isumitir ngadto sa Commission on Elections (COMELEC) uban sa Certificate of Candidacy (COC) sa mga kandidatong may partido.
Si Kongresista Gwendolyn Garcia mao ang opisyal nga kandidato sa PDP alang sa pagka-gobernador. Miduso na si Garcia sa iyang COC niadtong Biyernes, atol sa iyang ika-63 nga adlaw’ng natawhan.
Sa pakighinabi kaniya sa Banat News si Garcia miingon nga iyaha lang unyang isunod pagpaila kon kinsa ang iyang mamahimong running mate para sa pagka-bise gobernador.
Ang mga gipangalanan nga mga kandidato sa pagka-kongresista mao silang Dalaguete Mayor Ronald Allan Cesante sa 2nd District, Paul John Garcia sa 3rd District, ug Janice Salimbangon sa 4th District.
Samtang suportahan gihapon sa PDP si Talisay City Mayor Eduardo “Eddiegul” Gullas sa pagka-kongresista sa 1st District ug si Cebu Port Authority Commissioner Duke Frasco sa pagka-kongresista sa 5th District.
Si Frasco wala pa mipagawas og pamahayag kung mo-resign na ba siya isip commissioner sa CPA.
Sa hunta probinsyal, gikumpirma ni Garcia nga ilang suportahan sila si Yolanda Daan sa 1st District, Edsel Galeos sa 2nd District, Jimbo Borgonia sa 3rd District, Kerrie Shimura sa 4th District, Michael Villamor ug Red Duterte sa 5th District, ug sila si Junkie Ouano ug Glenn Soco sa 6th District.
Samtang dunganon lang pagpaila sa iyang mapares kon kinsa usab ang ilang pambato sa 7th District.
Ang pagpaila kanila gihimo human sa orientation seminar sa mga politiko nga nagpasakop sa PDP. Kasagaran sa mga nanambong mga mayor ug mga nangambisyong mapiling mayor uban sa ilang mga kapartido sa ilang lugar.
“We are very happy for their pledge of support,” sigon ni Garcia.
Apil sa mga prominenteng mitambong mao sila si Carcar Mayor Nice Apura, Consolacion Mayor Nene Alegado, Liloan Mayor Christina Garcia-Frasco, ug Pilar Mayor Eufrascio Maratas Jr..
Si Garcia mihagit sa mga kandidatong modagan ubos sa ilang partido nga paningkamotang paninduton ang ilang serbisyo aron mabalik ang Cebu nga numero unong probinsya sa nasud kay matud niya haom ug tukma para sa mga Sugboanon ang kinamaayohang serbisyo. (BANAT NEWS)
- Latest