Tulisan pasakaan gyud og kaso
Camille L. Pateres (Banat) - October 12, 2018 - 12:00am

CEBU, Philippines — Giawhag ni Cebu City Police Office Director, Senior Supt. Royina Garma, ang mga biktima sa pagpanulis ug pagpangawat nga mopasaka gyud og kaso batok sa suspek nga madakpan.

 

Matud ni Garma nga kadaghanan sa mga nabiktima dili na mopasaka og kaso kun mabalik na ang ilang butang.

Ang uban giingong malooy na sa suspek ilabi na og maghilak-hilak nga magpakilooy ang asawa ug magdala pa og mga anak.

“They are taking advantage sa Filipino culture nga malooy. Ayaw mo og kalooy oy. Kung di na ninyo pasakahan og kaso, looy ang sunod nga mabiktima ana,” sigun pa ni Garma.

Kun mapasakahan og kaso ang suspek unya madakpan na sab sa samang krimen, dili na kini makapiyansa.

Tulo ka suspek sa pagpanulis sa Dakbayan sa Sugbo diin ang usa may video nga nag-viral sa Facebook nadakpan sa follow-up operation sa kapolisan.

Si Police Senior Inspector Eduard Sanchez, hepe sa Cebu City Police Station 2, niila sa ilang dinakpan nga si Gil Lapiña Jr., habal-habal driver ug residente sa Barangay Tisa.

Si Lapiña ang habal-habal driver nga na-videohan nga nanglabni og cellphone sa usa ka pasahero sa jeep sa Lahug ug iya kining giangkon.

Miyerkules sa kaadlawon adunay nisumbong nga adunay armadong habal-habal driver sa dalan Acacia ug Gorordo Avenue, Kamputhaw diin sa pagresponde sa kapolisan nisuway pa og sibat si Lapiña apan nagukdan kini sa kapolisan.

Nakuhaan og usa ka paltik nga kalibre .22 colt magnum revolver nga adunay tulo ka bala ug usa ka gamay nga pakete sa gituohang shabu ang suspek.

Aduna say nadakpang tulisan sa naunang operasyon ang maong estasyonan niadtong Lunes kinsa ang suspek giila nga si Mark Regidor, 38, taga Barangay Tisa, pinaagi sa entrapment operation.

Nagpatabang sa ilang estasyonan ang usa ka sales lady kinsa gitulis sa may dalan M. Velez diin sa dihang gisuwayan pagtawag ang cellphone sa biktima, giingong buot kining ipalukat sa suspek sa kantidad nga P15 mil.

Malampusong nadakpan si Regidor apan nakasibat ang kunsabo niini kinsa maoy nagmaneho sa ilang gisakyang motorsiklo.

Sa Lorega-San Miguel niadtong Martes, gitulis ang usa ka 24-anyos nga babayeng call center agent kinsa padulong na unta mopauli gikan sa trabaho.

Sigun pa sa hepe sa Cebu City Police Station 1, Chief Inspector Kenneth Paul Albotra, nga gitionan og kutsilyo ang biktima sa duha ka suspek nga sila si Benjie Diaz, 19, ug usa ka alyas Ar-ar Jimeno, pulos residente sa Barangay T. Padilla. Giingong nagdumili sa paghatag sa iyang shoulder bag ang biktima ug nakiglabnotay pa ni Diaz hinungdan nga nasamad ang tudlo sa biktima ug nabuhian ang bag.

Sa follow-up operation nadakpan si Diaz apan wala na hikit-i si Jimeno.

Ang hepe sa Mabolo Police Station nga si Chief Inspector Dindo Juanito Alaras niingon nga nakig-alayon na sila sa maong mga estasyonan aron masuta kun usa ba sa mga suspek maoy nitulis ug nipusil patay sa call center agent nga si Loraine Temple niadtong Oktubre 4. – GMR (BANAT NEWS)

 

ROYINA GARMA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with