Kawat, tulis nisiaw sa siyudad

CEBU, Philippines — Giangkon ni Cebu City Police Office Director, Senior Superintendent Royina Garma, nga nidaghan ang insidente sa crime against property diin dunay tulis ug uban pa.

Mando ni Garma sa iyang mga sakop nga sulbaron ang krimen, susihon og balik ang rogue gallery ug makig-alayon sa Bureau of Jail Management and Penology (BJMP) kun duna bay mga piniriso nga ang kaso robbery, pagpangawat ug pagpanglabni ang nakagawas na. Dunay impormasyon nga nadawat si Garma nga dunay mga bag-ong laya hinungdan nga iyang gimanduan ang iyang intelligence officer nga i-monitor basin og namalik sa dautang binuhatan.

Nagkanayon si Garma napanglantawan na niya nga mosaka gyud ang ingon niini nga kaso tungod sa ilang subsob nga kampanya batok sa ginadiling drugas.

“Pagka nahuli kasi natin ang yung bread winner kailangan kumain yung pamilya pa rin so it’s either they will resort to be involved sa pagnanakaw,” matud ni Garma.

Usa sab sa nakitang hinungdan nga pagsaka sa ingon niini nga kaso tungod kay ang buwan sa Oktubre tingbayad sa tuition fee sa mga tinun-an dayon na sa Nobiyembre enrolment sab ug sa Disyembre holiday season ug sa Marso balik na sab ang klase.

Apan alang kang Garma luwas gihapon ang Sugbo ilabi na ang siyudad dungan sa pagbutyag nga ang mga krimen nga nahitabo giimbestigar na nila ug naningkamot sila nga mawala na ang street crimes pinaagi sa pag-maximize sa presensiya sa kapolisan sa kadalanan ingon pinaagi sa tabang sa komunidad. – GMR (BANAT NEWS)