Anak sa Haponesa mokiha sa papa, kauban

CEBU, Philippines — Babayeng anak sa 71-anyos nga Haponesa kinsa gipusil patay sa may Natalio Bacalso Avenue giingong adunay gihuptang lig-ong ebidensya nga magpamatuod nga ang iyang amahan ang utok sa pagpatay sa iyang inahan.

Sigun sa kasaligang tinubdan nga adunay video ang nag-inusarang anak sa biktima nga gihulga sa iyang papa ang inahan nga si Junko Hamada.

Gitumbok nga hinungdan mao ang pagdumili sa biktima sa paghatag sa iyang bana og bahin sa ilang negosyo nga furniture nga nahimutang sa Dakbayan sa Talisay.

Kagahapon nibisita sa Cebu City Police Office ang anak niini aron mopirma og affidavit alang sa pormal nga pagpasaka og kaso apan nauswag sanglit wala sila magdala og abogado.

Karong adlawa pormal nga mapasaka ang kaso batok sa bana sa biktima, uyab niini nga giingong kakunsabo sa krimen nga si Mary Jane Aguilar ug sa giingong gunman nga si Gb Bertulfo.

Giangkon ni Bertulfo ang krimen ug nibutyag nga angkas niya si Aguilar niadtong higayuna kay siya ang nitudlo sa target sanglit wala siya kaila sa biktima. – GMR (BANAT NEWS)