Mga residente sa LGUs sa Probinsiya sa Sugbo nabalaka sa dahili sa yuta

CEBU, Philippines — Gibisita sa mga personnel sa Provincial Disaster Risk Reduction and Management Office (PDRRMO) ang usa ka dapit sa Barangay Daanlungsod sa Lungsod sa Tuburan tungod kay nabalaka ang mga   residente sa lugar nga modahili ang yuta.

Ang giingong yuta nga gikabalak-ang modahili nahimutang kini sa ibabaw’ng bahin sa Daanlungsod Elementary School.

Matud ni Rhee Telen, Jr., information management staff sa PDRRMO nga gisusi na kini sa mga sakop sa ilang buhatan uban usab sa engineering office sa Kapitolyo.

Ang tulo ka ektaryang luna sa ibabaw nga bahin sa maong eskwelahan adunay kaugmaran nga gihimo diin diha sa maong lugar gitukod sa kagamhanan sa probinsiya ang training center sa Technical Education and Skills Development Authority (TESDA).

Gitataw ni Telen nga dili quarry operation ang gipahigayon diha sa lugar diin adunay gitangtang ug gitam-ok nga yuta ug apil kini sa site development.

 Gibutyag ni Telen nga gawas sa Daanlungsod aduna pay mga barangay sa Tuburan nga ilahang gisusi,

Gawas sa Tuburan aduna pay mga request nga nadawat ang PDRRMO gikan sa ubang Local Government Unit (LGU) nga gilangkuban sa Asturias ug Carmen. - BDB (BANAT NEWS)