Selda sa CPDRC dugangan

CEBU, Philippines —  Adunay idugang nga unom ka selda sa Cebu Provincial Detention and Rehabilitation Center (CPDRC) isip pamaagi sa pagtubag sa kahuot na sa prisohan. "Actually ang pun-an ra man to ang selda sa babaye, kay akong ibalhin ba (ang mga babaye nga inmates) unya ang 6 (nga selda) ari sa gawas sa canteen," matud sa warden sa CPDRC nga si Reynaldo Valmoria.

Ang 289 ka babaye nga inmates nga sa pagkakaron maoy nag-estar sa unom ka selda nga i-renovate ibalhin sa mess hall ug ipuli sa maong mga selda ang high profile inmates.

Ang Kapitolyo maggahin og P8 ngadto sa P10 milyones nga pondo alang sa maong mga selda diin apil na niini ang trabahoon nga drainage system sa CPDRC.

Samtang gitug-an usab ni Valmoria nga sa Lunes ibalik na niya ang dalaw sa mga inmates nga adunay kaso sa ilegal nga drugas apan way labot niini ang mga piniriso sa siyam ka selda nga nakuhaan og ilegal nga drugas atol sa greyhound operation nga gihimo sa kapolisan duha ka semana na ang nilabay.  -  GMR (BANATNEWS)