Duha ka minor gibaligya ngadto sa negosyante

CEBU, Philippines – Gitanggong sa detention cell sa Liloan Police Station ang usa ka negosyante ug kauban niining lalaki nga nadakpan sa kasong human trafficking samtang naluwas ang 13-anyos ug 17-anyos nga babaye nga ilang gidala sa Lungsod sa Compostela.

Si Police Officer 3 Jennifer Lapeña sa Women and Children Protection Desk sa Liloan Police Station niila sa nadakpan nga si Warlito Villegas, 48, ug kauban niini nga si Antonio Bequilla, 54, taga Lungsod sa Compostela.

Ang inahan sa 13-anyos nga babaye ang nangayo og panabang human gidala sa mga suspek ang iyang anak alang sa pagpakighilawas.

Matud ni Lapeña nga nagtuo ang inahan sa 13-anyos nga gibaligya ang iyang anak alang sa pagpakighilawas sa negosyante nga si Villegas.

Sa pasiuna nga imbestigasyon nasayran nga si Villegas ang giingong nibayad og P2,300 kang Bequilla alang sa pagpangita og babaye.

Si Bequilla ang giingong nidala sab og laing 17-anyos nga babaye alang kang Villegas. (/GMR)(BANAT NEWS)