14 ka Paglaum Scholars moadto sa South Korea

CEBU, Philippines — Mga 14 ka Paglaum Scholar  sa Kapitolyo ang gikatakdang moadto sa South Korea alang sa “exchange student” program tali sa Probinsiya sa Sugbo ug sa Probinsiya sa Gangwon sa maong nasud.

Matud ni Bise Gobernador Agnes Magpale nga sa umaabot nga buwan sa Disyembre karong tuiga gikatakda nga mobiyahe ang maong mga gipili nga scholar.

Duha ka scholars matag distrito ang pilion sa Kapitolyo pinaagi sa pag-raffle aron nga moadto sa South Korea kon diin sila ma-exposed sa tradisyon ug kultura sa maong nasud.

Ang Kapitolyo apil kini nga mogasto sa plete lakip na sa mga sinina sa mga bata sanglit bugnaw man sa maong nasud atol sa nahisgutang buwan. Ang 14 ka scholars gipaubos kini sa leadership training niadtong Septiyembre 8 ug ang ikaduhang hugna mao ang  43 ka Paglaum Scholars nga gipaubos sa susamang training niadtong Septiyembre 13.

Ang Probinsiya adunay 1,000 ka scholar kinsa kasagaran kanila anaa mag-eskwela sa state colleges ug universities diin ang Kapitolyo maoy mobayad sa ilang tuition ug miscellaneous fees ug aduna pa silay P1,500 nga allowance matag bulan. – BDB (BANAT NEWS)