P35 milyon road concreting project dili una ipaimplementar ni Tomas

CEBU, Philippines — Ang P35 milyones nga road concreting project diha sa dalan Tres de Abril nga magsugod unta niadtong adlaw’ng Lunes wala una ipaimplementar ni Cebu City Mayor Tomas Osmeña.

Buot sa mayor nga huwaton una nga mahuman ang underpass project diha sa Natalio Bacalso Avenue ug F. Llamas Street.

Si Konsehal Eugenio Gabuya, Jr., chairman sa committee on public services nagpatawag og meeting nga gitambongan sa mga representante sa Department of Public Works and Highways, Cebu City Engineering District, Cebu City Transportation Office ug kontraktor sa proyekto nga mao ang Quirante Construction Corporation diin ang nahisgutang mga hingtungdan gipahibawo sa maong kamanduan ni Osmeña.

Giuyonan nga ang maong proyekto anha una magsugod sa karsada dapit sa Miller Hospital ug ang maong karsada dili kini hingpit nga sirad-an sanglit usa ka lane una ang ilang trabahoon aron makaagi sa pikas lane ang mga sakyanan.

Apan bisan pa niini gilauman nga makasinati og kahuot sa trapiko ang nahisgutang lugar atol sa pagtrabaho sa karsada. – BDB (BANAT NEWS)