P2M gikan sa Kapitolyo ug Cebu City tabang sa Naga

CEBU, Philippines — Mohatag ang Probinsya sa Sugbo og P1 million ngadto sa Dakbayan sa Naga ug laing tabang usab alang sa mga pamilya sa mga natabonan sa landslide sa Barangay Tinaan nga tag P10 mil kada usa nga nakalas.

Matud ni Gobernador Hilario Davide III andam usab ang probinsya nga ihatag ang pila ka parte sa Balili property sa Kapitolyo ngadto sa Dakbayan sa Naga  nga unang giplanohan sa duha ka lokal nga pangagamhanan nga paliton sa City of Naga.

“We offered Balili property for relocation… Which is on top of the assurance of the President given last Friday nga iyang ipadala ang administrator sa NHA para sa housing,” matud ni Davide.

Gitataw hinoon sa gobernador nga iya pa kining ipananghid ngadto sa Hunta Probinsyal ug sila nay bahala kon motugot sa maong plano.

Samtang gipahibalo ni Mayor Kristine Vanessa Chiong nga ang P25 milyones unta nilang  pang down payment sa pagpalit sa Balili Property mao na lay gamiton alang construction ug site development alang sa housing property.

Matud pa ni Chiong tungod kay ihatag na man sa ilaha ang maong luna gamiton na lang nila ang pundo sa relokasyon sa mga apektadong pamilya.

Paabuton nila ang National Housing Authority ug sa Housing and Land Use Regulatory Board nga maoy motabang sa relokasyon.

Gitug-an usab ni Chiong nga si Kongresista Gerald Anthony “Samsam” Gullas misaad usab nga motabang pagpangita og ayuda alang sa relocation site.

Sa laing bahin, ang Cebu City gikatakda usab nga mohatag og P1 milyon nga inisyal nga hinabang alang sa Naga sumala pa ni Executive Assistant to the Mayor Francisco “Bimbo” Fernandez.

Matud ni Fernandez nga si Cebu City Mayor Tomas Osmeña  mimando kaniya nga i-proseso ang financial assistance ug ilaha kining iduso sa Konseho aron maaprubahan.

Samtang ang pangulo sa Cebu City Social Welfare and Development Services (CSWS) Lea Japson miasoy nga duna sila’y duha ka drop in center sa Public Library diha sa may Capitol ug Plaza Sugbo alang niadtong gustong modonar.

Matud niya gikinahanglan kaayo ang mga canned goods, tubig o kaha cash alang sa mga biktima. (BANAT NEWS)