Kapitolyo way mining engineers ug geologist

CEBU, Philippines — Nagplano karon ang Probinsya sa Sugbo sa pagkuha og mining engineer ug ingon man geologist nga maoy motabang sa himoon niini nga inspeksyon sa tanang quarry operation sa lalawigan.

Matud ni Gob. Hilario Davide III kinahanglan kini aron nga mapadali usab ang himoong audit ug inspection sa maong mga operasyon human sa nahitabong pagdahili sa yuta sa Barangay Tinaan, Dakbayan sa Naga.

Ang gobernador una na kining nimando sa pangulo sa Provincial Environment and Natural Resources (PENRO) nga temporaryong ipahunong ang tanang quarry operation sa lalawigan sa Sugbo alang sa himoon unya nga inspection ug assessment.

Hinoon, gipadali kini ni Davide aron nga dili usab maapektohan ang kliyente sa mga quarry operators.

“Dili na mo take months, I instructed Lozano make it quick, labing dugay  ana siguro ana 20 days kay duna man ni silay obligasyon, duna ni silay mga kliyente kining mga quarry operators kay they have to produce tungod sa mga construction business,” matud ni Davide.

Uyon usab si Davide hunongon na ang tanan matang sa pagmina ug quarry operation sa nasud kon dili matarong ang pagpatuman sa estriktong mga palisiya alang sa kaluwasan sa mga residente palibot niini. (BANAT NEWS)