Duha ka quarry sites gipahunong ni Mayor Gullas
CEBU, Philippines — Gipahunong ni Mayor Eduardo Gullas sa Siyudad sa Talisay ang duha ka quarry sites nga nag-operate sa dakbayan tungod sa nahitabong pagdahili sa yuta sa Dakbayan sa Naga nga nikalas og daghang kinabuhi.
Aduna’y duha ka quarry site nga nag-operate sa Talisay nga mao ang QM Builders ug Aznar Quarry. Kini makita sa Barangay Jaclupan lahos na sa bukirang barangay.
Si Gullas nipadala na sab og suwat sa taga Mines and Geosciences Bureau (MGB-7) aron mainspeksyon ang mga quarry sites kay di siya gustong mahitabo sab sa iyang dakbayan ang nahitabo sa Naga.
“All quarry activities within Talisay City are hereby temporarily suspended effective immediately pending investigation, inspection and clearance for the DENR Mines and Geosciences Bureau Region-7,” tipik sa notice of suspension sa mayor.
Samtang si Dr. Jomar Rubio, executive secretary nagkanayon nga gipaabot nila ang taga MGB-7 nga mohimo sa inspeksyon sa labing daling panahon.
“Dili gyud ni pabalikon sa ilang operasyon ang quarry samtang dili pa masusi ang lugar sa taga MGB,” nagkanayon si Rubio.
Una niini si Gobernador Hilario Davide III nisuspenso sa operasyon sa tanang quarry operations sa lalawigan tungod sa nahitabo sa Naga.
Si Department of Environment and Natural Resources (DENR) Secretary Roy Cimatu nipakanaug sab sa suspension sa walo ka rehiyon.
Apan si Rubio nidugang nga bisan pa og libkason ang suspension apan magpadayon ang suspension nga gipatuman sa mayor hangtud di siguradohon sa MGB nga luwas ang mga lumolupyo sa lugar. (BANAT NEWS)
- Latest
