Magpasiugda sa “Red October” gipanid-an
CEBU, Philippines — Gi-monitor sa Police Regional Office sa Central Visayas (PRO-7) ang ilang mga sakop aron pagsigurong dili sila mosalmot sa mga planong pagpalagpot kang Presidente Rodrigo Duterte. Si Superintendent Reyman Tolentin, ang tigpamaba sa PRO-7 masaligon nga nagkahiusa sila sa rehiyon ug way angay ikabalaka ang presidente.
“We assure the president nga ang kapulisan sa PRO-7 100% gyud nga misuporta sa iya,” sigon pa ni Tolentin.
Kahinumdoman nga ang Armadong Kusog sa Pilipinas mibutyag nga adunay planong paglusad og lapad nga protesta aron palagputon si Duterte sa sunod buwan nga gibansagang “Red October.”
“There will still be a plan this coming October. They call it Red October. That is the month of international celebrations for communism, Marxism and IP (indigenous peoples),” asoy pa ni Brig. Gen. Antonio Parlade, AFP deputy chief of staff for operations.
Giingong gisugdan ang maong plano niadtong Septiyembre 21 nga gipanguluhan sa founder sa Communist Party of the Philippines-New People’s Army (CPP-NPA) Jose Maria Sison ug giingong mga kontra sa pulitika ni Duterte.
Apan ang kasundalohan dinhi sa Central Command giingong solido nga nagkahiusa pagpaluyo ni Duterte ug walay destabilisasyon nga mahitabo gikan dinhi. (BANAT NEWS)
- Latest