Mga negosyante mihatag og P1M sa PRO-7

CEBU, Philippines — Grupo sa mga negosyante midonar og usa ka milyon ka pesos aron itabang sa mga polis sa rehiyon siyete nga nag-atubang og kaso samtang naghimo sa ilang trabaho batok sa ilegal nga drugas.

Sumala pa sa direktor sa Police Regional Office 7 nga si Chief Supt. Debold Sinas nga sugod niadtong Hulyo 1, 2016 adunay 193 ka mga polis nga gipasakaan og kaso nunot sa ilang operasyon batok sa ilegal nga drugas ug ubang krimen.

Lakip na niini ang duha ka mga operatiba sa Drug Enforcement Unit sa Carbon Police Station ug ang ilang hepe kinsa  gipangkasohan human usa kanila gipasanginlang maoy nakapusil-patay  sa 4-anyos nga si Skyler Abatyo atol sa ilang operasyon kontra drugas didto sa Sitio Bato, Barangay Ermita sa Dakbayan sa Sugbo niadtong Hulyo 10 ning tuiga. Nasayran nga gipasakaan sa National Bureau of Investigation-7 og kaso ang ilang hepe nga si Police Chief Inspector John Kareen Escober, ug ang duha niya ka sakop nga silang PO1 Wilbert Perez ug si PO1 Rey Van Dadula.

Nasuta sa imbestigasyon sa NBI-7 nga gikan sa armas ni Perez ang nakapatay sa bata human kini aksidenteng nakapabuto sa iyang armas gumikan sa iyang pagkatagak sa hagdanan atol sa giingong operasyon.

Ang bala milusot paingon sa kwarto nga nahimutangan ni Abatayo kinsa niadtong tungora naghimo sa iyang assignment sa eskuylahan.

Gipadayag ni Sinas ang iyang dakong pasalamat sa pribadong sektor sa maong hinabang kay dako kini og matabang sa mga polis.

Matud niya personal nga kwarta ang gamiton alang sa acceptance fee, affidavit draft fee, appearance fee ug uban pang kinahanglang bayaran niadtong mga polis nga gipangkiha.

Sa laing bahin, giangkon ni Sinas nga dili ikalimod nga aduna gyuy mga badlungong mga polis, ug sila sa PNP naninguha gyud nga matangtang sila sa serbisyo. Si Sinas namulong niini atubangan sa 48th Cebu Press-Citizens Council (CPCC) quarterly meeting isip keynote speaker atubangan sa mga beteranong mga tigbalita sa Sugbo niadtong Huwebes.

“Yes, there are still a lot of policemen involved in illegal activities, but we are monitoring them, we are trying our best targeting our own men,” matud pa niya.

Una nang gibansagan ni Pres. Duterte ang kapolisan sa Sugbo hasta ang mga sakop sa Philippine Drug Enforcement Agency-7 nga mga adik ug mga drug pushers atol sa pagtambong sa presidente sa tigom sa mga sakop sa League of Municipalities of the Philippines (LMP) dinhi sa Sugbo.

“Ang pulis ninyo diri sa Cebu, puro addict. Halos tanan. Hasta ang ilang mga opisyal. Hasta ang inyong PDEA…mao pa ang distributor,” matud ni Duterte anang adlawa.

Si Sinas misaad nga kon adunay mamasangil kaniya nga nagdawatan og suborno gikan sa bisan unsang ilegal nga mga kalihokan, siya na mismo maoy mokanaog sa iyang pwesto.

“I told my staff nga ayaw gyud mo og dawat kay kita gyud magtigi ug tanggalon gyud tika. We have to lead by example,” matud niya. (BANAT NEWS)