Children’s park sa Barangay Pasil ipaatiman

CEBU, Philippines — Human sa duha ka tuig nga naablihan ang children’s park sa Barangay Pasil, Siyudad sa Sugbo dili na kini maduwaan sa mga bata tungod kay wala kini matarong og mentinar. Ang konseho sa siyudad nihangyo sa Parks and Playgrounds nga i-restore ug i-maintain pagbalik ang San Nicholas Children’s Park diha sa nahisgutang barangay aron adunay masuroyan ug maduwaan ang mga bata nga nagpuyo diha sa lugar lakip ang silingang barangay.

Si Konsehal Joel Garganera nagkanayon nga ang open grounds ug ang mga playground makatabang sa personal growth sa mga bata ug sa social welfare nila tungod kay makaila sila og laing mga bata ug dili lang magpunay og atubang sa mga gadget.

“Due to the passage of time, the cranes and other animal decorations that are crafted out of recycled tires have been removed and piled at the far end of the park. Instead of young kids and their families playing around, wild shrubs and garbage now fill the children’s park and the recreational equipment are no longer well-maintained and preserved by the city government”,  tipik sa resolusyon ni Garganera.

Ang nahisgutang 3,000 square meters nga park sa Barangay Pasil nabuksan kini niadtong Pebrero 24, 2016 atol sa 79th Charter Day sa siyudad.

Kaniadto dunay maanindot nga slides, swings, seesaws ug uban pang duwaanan sa mga bata ang park. Adunay mga ginamit nga ligid nga gi-recycle ug giporma og mga objects sama sa mga bao, bitin, ug uban pa nga hayop.

Apan tungod sa kakuwang sa pagmentenar sa park naguba ang maong mga duwaan sa mga bata ug nabulit na sa hugaw.

Sa iyang bahin, si Konsehal Joy Augustus Young nagkanayon nga planong gamiton sa siyudad aron tukoran og school building sa Barangay Pasil ug sa Suba ang maong park.

Samtang si Konsehal Alvin Arcilla nagkanayon nga planong gamiton sa market authority ang lugar aron himuong temporaryo nga kabalhinan sa Pasil Fish Port ug nagpaabot pa sila sa P4.9 milyones nga budget alang sa renovation sa fish port. (/BDB)(BANATNEWS)