Mga kanal sa Mandaue ug Tipolo Creek hawanan sa basura
CEBU, Philippines — Gitinguha karon ni Mayor Luigi Quisumbing ang pagpanglimpiyo sa mga kanal diin una kini nga pagahimuon diha sa merkado publiko sa Dakbayan sa Mandaue ug Tipolo Creek.
Ang maong tinguha ni Quisumbing gipaluyohan usab sa pipila ka pribadong establisamento pinaagi sa pagtanyag nga maoy gamiton ang ilang mga kahimanan ug ekipo sa pagpanglimpiyo. Nunot niini, gihimo sa mga kadagkoan sa HTLand ang pagpakiglambigit sa kagamhanan sa dakbayan sa coastal cleanup drive nga ilang pagahimuon.
Naglakip sa pagalimpiyohan ang Tipolo Creek sa Barangay Tipolo nga nagtadlas sa Sitio Tribunal, Barangay Centro ug gamiton sa HTland ang ilang ekipo nga EM 1 Technology nga mokubkob sa mga lapok.
Tumong sa maong lakang nga malikayan ang pagbaha diha sa kadalanan sa siyudad diin molahos ang tubig diha sa kabalayan.
Ang siyudad higpit usab nga nipatuman sa ordinansa sa tukmang paghipos sa mga basura pinaagi sa paglainlain sa malata ug dili malata.
Gidili usab sa siyudad ang paggamit og mga plastik tungod kay mao kini makabara sa dagayday sa tubig diha sa mga kanal nga usa sa hinungdan sa pagbaha. (/BDB)(BANATNEWS)
- Latest