Lolo napalgan sa apo nga wala nay kinabuhi
CEBU, Philippines — Patay na nga napalgan sa iyang apo niadtong Biyernes sa buntag diha sa unahan sa ilang balay sa Sitio Pamintacan, Barangay Cabasiangan, Lungsod sa Balamban ang 65-anyos nga lolo kinsa nakabaton og samad tinigbasan.
Ang biktima giila sa kapolisan sa lungsod nga si Guillermo Tundag, residente sa maong dapit, nakaangkon kini og samad tinigbasan sa iyang liog nga gituohang maoy hinungdan sa iyang kamatayon.
Si Police Senior Inspector Deni Mari Pedrozo, hepe sa Balamban Police Station nagkanayon nga ang 13-anyos nga babayeng apo sa biktima paingon unta kini ngadto sa eskwelahan dihang nalantawan niini pila ka metros gikan sa iyang nahimutangan ang iyang apohan nga naligo sa kaugalingong dugo diha sa punoan sa mangga. Base sa imbestigasyon sa kapolisan giingong adunay nakaaway ang biktima pipila ka adlaw ang nakalabay.
Gisubay usab sa kapolisan kung nalambigit ba kaniadto og krimen ang biktima diin posibleng gipanimaslan kini. Ang kapolisan adunay duha ka persons of interest nga gidudahang nalambigit sa krimen ug padayon pa kining gipangita karon. (/BDB)(BANATNEWS)
- Latest