TF Foundation nagpakabana sa mga biktima sa landslide

CEBU, Philippines — Ang The Freeman Foundation nitunol usab og relief goods lakip na niini mga hygiene kit ug nipakaon sa mga biktima sa landslide sa Dakbayan sa Naga.

Ang mga biktima sa landslide kasamtangan kining nagpuyo diha sa mga evacuation center sa Naalad Elementary School, Naga Central School, Naga National High School ug Enan Chiong Activity Center (ECAC).

Gawas sa relief goods nga gitunol nipahigayon usab og libreng medical checkup ang foundation diha sa Naga Central School ug ang The Philippine Star Damayan nanghatag og           libreng mga tambal ug vitamin.

Mga 1,500 ka hygiene kit ang gihatag sa foundation diin ang 200 niini ang gipang-apod-apod na ngadto sa mga biktima ug ang nahibilin nga 1,300 gitugyan nila sa Department of Social Welfare and Development  (DSWD) kinsa mao na ang nipadayon sa pagpahangtag.

Ang maong hygiene kit adunay sulod nga sabon, toothpaste, toothbrush, towel ug shampoo.

Matud ni The Freeman Foundation administrator Dr. Remedios Bacasmas nga kasagaran sa mga bakwit aduna kini sip-on ug ubo ug adunay nagkalibanga.

Si Bacasmas niawhag sa ubang mga tawo nga dunay mahatag nga unta motunol usab kini og hinabang ngadto sa mga biktima.

Ang Colon Noodles, San Jose Bakeshop ug Gardenia lakip sa niabag sa The Freeman Foundation sa mga hinabang nga natunol ngadto sa mga biktima ug ang maong mga establisamento  kanunay usab nga nitabang sa mga outreach program sa foundation.

Sa laing bahin, nikabat ngadto sa P200 mil nga cash assistance ang ihatag sa kagamhanan sa Dakbayan sa Mandaue ngadto sa mga biktima sa landslide sa Dakbayan sa Naga.

Si Mayor Gabriel Luis Quisumbing niawhag kang Bise Mayor Carlo Fortuna nga moduso og resolusyon alang sa financial assistance sa mga naapektohan sa landslide.

Si Fortuna nisaad kining ang siyudad mopagawas sa maong kantidad kung maaprobahan na sa konseho ang resolusyon.

Human sa pagkahitabo sa maong trahediya ang kagamhanan sa Dakbayan sa Mandaue nipadala dayon og personnel sa Bantay Mandaue kinsa nitabang sa search and rescue operations.

Gawas niini,  ang City Social Welfare Service Office sa siyudad nipadala usab og duha ka mobile kitchen ngadto sa mga evacuation center sa Dakbayan sa Naga diin nitabang kini sa social workers sa apektadong siyudad sa paghatag og mga pagkaon ngadto sa mga biktima. (Christell Fatima M. Tudtud/BDB)(BANATNEWS)