Maabtan pa og semana ang pagpangita

CEBU, Philippines – Maabtan pa og lima ngadto sa pito ka adlaw ang himoon nga search and rescue (SAR) operations sa mga natabunan sa yuta sa Sitio Sindulan, Barangay Tinaan, Dakbayan sa Naga matud pa ni Baltazar Tribunalo, ang pangulo sa Provincial Disaster Risk Reduction Management Council.

Base sa talaan alas-8 kagabii, niabot na og 29 ang kompirmadong patay samtang aduna pay mga na-missing.

Kadaghanan sa mga nailhan nang mga nakalas gikan sa pamilyang Campanilla nga naglakip sa lima ka mga bata, sunod ang pamilyang Lobiano nga may tulo nila ka mga kabanay ang nailhan na samtang unom usab ang sa pamilyang Siton.

Dugang unom usab ka tawo ang nailhan na nga sila si Olivia Meneses Moral, 63; Romeo Jabonilia, 40; Michael Versales, 16; Vianca Versales, 19; Raul Gepuit, 47; ug Laura Capoy, 52. Aduna pay usa ka babaye ug tulo ka lalaking wa pa mailhi ug usa nga naugkat apan wala pa mahibaw-i kon lalaki o babaye.

Samtang si Dr. Rene Cam, medico legal sa NBI-7 miingon nga kadtong mga patay’ng lawas nga wala pa gyud mailhi kuhaan og fingerprints aron itandi sa voters list nga diin aduna silay mga tamla. Gawas pa niini, mahimo usab basehan ang dental records ug DNA test.

Ang haya anha gibutang sa Naga City Badminton Court samtang ang gibanabanang 1,493 ka bakwit gibutang sa Cepoc Elementary School, Naalad Elementary School, Apo Gym, Naga Central School, Naga National High School, ug sa Enan Chiong Activity Center (ECAC).

Matud ni Tribunalo pangitaon gyud nila ang mga na-missing kay dako ilang pagsalig nga aduna pay mga buhi ug maluwas pa sila.

Si Mayor Kristine Vanessa Chiong nagpasalamat sa mga rescuers gikan sa nagkadaiyang lugar nga sa unang adlaw pa lang nangabot dayon ug nitabang pag-ugkat sa mga biktima.

Giingong nasagmuyo ang ubang rescue groups sa unang adlaw tungod kay dali ra dayon silang gipagawas sa site.

Si Nagiel Banacia sa Cebu City Disaster Risk Reduction and Management Office miingon nga kaning pagresponde dayon sa tanang rescue groups sa Sugbo bunga kini sa ilang trainings, conventions ug summits nga gipasiugdahan sa probinsya. Nagtuo hinuon si Bañacia nga ‘miscommunication’ lang ang nahitabo.

Si Gob. Hilario Davide III niawhag sa provincial board nga maghimo og inquiry aron sutaon kon kinsay angay manubag. (The Freeman/IBM)(BANAT NEWS)