Opisyales sa MGB-7 girelibohan

CEBU, Philippines – Si Environment Secretary Roy Cimatu miparelibo sa kadagkoan sa Mines and Geoscience Bureau-7  nga silang MGB Region 7 Director Loreto Alburo; chief geologist Al Emil Berador; supervising geologist Dennis Aleta; and legal officer Atty. Gerardo Mahusay tungod sa trahedya.

“I am relieving the top leaders of MGB... I will be sending investigation team to conduct thorough investigation on why and how it happened and what should we do,” matud pa niya kagahapon.

Sila imbestigahon ug hulipan una sa mga opisyales gikan sa MGB -Manila.

Gipahibalo usab ni Cimatu nga suspendido suds a 15 ka adlaw ang tanang quarry operations sa Central Visayas samtang naghimo og assessment ug review sa safety compliance sa mga quarry operators.

Apil na niini ang Regions 1, 3, 4A, 5, 7, 10, 11, ug 13.

Samtang ang kadagkoan sa Apo Cemex nipasalig nga mohatag og ayuda sa mga apektadong pamilya sa pagdahili sa yuta sa Barangay Tinaan, Dakbayan sa Naga apan miklaro nga wala sila nangubkob sa lugar.

Si Chito Maniago, representante sa Apo Land and Quarry Corporation atol sa command conference miingon nga ang ilang kompanya mohatag og tag P30 mil sa mga apektadong pamilya. Pipila sa mga kabanay nga naapektahan ang nanawagan nga ipahunong na ang operasyon sa maong kompanya, samtang aduna say uban nga di mosugot tungod kay nabuhi ilang pamilya pagpanarbaho sa maong kompanya.

Apan iyang giklaro nga wala silay actual quarry operation sa lugar apan nilihok ang yuta sa lugar kay dunay gipahigayong site road development nga nagamit og mga ekipo ug may koordinasyon kini sa mga hingtungdan ahensya.

Apan si Gob. Hilario Davide III miklaro nga walay  permit nga gihatag ang Kapitolyo ngadto sa APO Land And Quarry Corporation (ALQC) sanglit ang kasabotan niini anaa sa Department of Environment and Natural Resources (DENR) pinaagi sa Mineral Production Sharing Agreement (MPSA).

Gimando niya nga ipahunong ang tanang matang sa quarry activities sa pagkakaron.

Si Mayor Kristine Vanessa Chiong sa Dakbayan sa Naga nipagawas usab og executive order nga nagpahunong sa tanang mining operation activities, small scale quarries, sand and gravel extractions ug uban pa nga susama nga aktibidades sa iyang dakbayan.( Rowena Capistrano, Gabriel Bonjoc ug Romeo Limpangog/IBM)(BANAT NEWS)