Nangisyu og swertres dili makamao mobasa ug mosuwat?

CEBU, Philippines – Gitanggong sa kapolisan sa Presinto 5 sa Mandaue City Police Office (MCPO)  ang usa ka 17-  anyos nga lalaki nga giingong nangisyu og swertres ug nadakpan niadtong Martes sa gabii diha sa dalan Soriano, Barangay Centro, Dakbayan sa Mandaue.

Si Police Officer One Mar Expideto Villamonte ang nakadakop sa maong menor kinsa gialigar sa kapolisan nga nakuhaan og usa ka stub, ballpen ug P50 nga giingong halin sa ilegal nga pagpangisyu.

Ang maong menor gipasakaan na og kaso nga kalapasan sa Republic Act 9287 o pagpasiugda og ilegal nga sugal.

Ang inahan sa maong menor nihimakak sa pasangil batok sa iyang anak tungod kay giingong wala kini makaeskwela hinungdan nga dili kini makamao nga mobasa ug mosuwat .

Ang maong inahan nangangkon nga gisugo niya og papalit og tambal sa botika ang iyang anak diin uban sa 6-anyos niyang apo naglakaw  kini diha sa maong dapit.

Giingong ang 6-anyos nga bata kinsa mao na lang ang nabalik sa ilang balay ang nitug-an sa iyang apohan nga gihunongan sila og kolor itom nga sakyanan ug gipasakay ang iyang uyoan. (/BDB)(BANAT NEWS)