Mga bukirang barangay sa Sugbo wala na unya’y dead spots
CEBU, Philippines – Gipaabot nga makasinati na unya og maayong signal ang mga residente sa bukirang barangay sa Siyudad sa Sugbo tungod kay aduna na unyay mga cell site nga iinstolar.
Si Konsehal Jerry Guardo nagkanayon nga ang mga cell site provider nga gilangkuban sa Globe ug Smart/Sun nipasalig nga wala na unyay dead spots ang mga bukirang barangay sa tunga-tungang bahin sa sunod tuig.
Ang mga cell site provider sama sa Globe niaplay og application alang sa lima ka sites nga iinstolar unya diha sa Barangay Tabunan, Bonbon, Guba, Sirao ug uban pang bukirang barangay.
Ang Smart/Sun niaplay usab og application alang sa installation sa cell sites diha sa Mahayahay, Adlaon, Guba, Binaliw ug Bonbon.
Gibutyag ni Guardo nga sa mga lowland barangay ang siyudad nakadawat og reklamo gumikan sa hinay nga signal diin gipangitaan na kini og pamaagi aron matubag ang reklamo.
Sa pagkakaron, ang Sun ug Smart adunay pending application sa 21 ka cell site sa downtown ug ang Globe adunay unom ka pending application alang sa lowland barangays.
Wala pa hinuon makahatag og timeline ang mga cell site provider apan gipasalig ni Guardo nga sila sa city government motabang sa mga cell sites provider nga mapaspasan ang ilang application.
Giawhag usab ni Guardo ang mga barangay official nga motabang sa pag-assist sa pending application sa mga cell site provider aron makab-ot ang timeline. (/BDB)(BANAT NEWS)
- Latest
