P15 milyones nga shabu nasakmit

CEBU, Philippines – Gisubay karon sa kapolisan ang posibilidad nga adunay koneksyon sa mga Parojinog sa Ozamiz City ang nadakpan sa buy-bust operation ug nakuhaan og 1.25 ka kilong gituohang shabu nga mobalor og dul-an sa P15 milyones.

Kini ang gibutyag sa direktor sa Cebu City Police Office, Senior Supt. Royina Garma, nunot sa kadaku sa shabu nga nakuha gikan sa tulo ka dinakpan.

Ang mga nadakpan mao sila si Ronnel Yee Ylanan alyas Angel, 26, taga Lorega San Miguel, Adel Villafuerte, 40, ug asawa niini nga si Jasmin Villafuerte, 40, taga Pahina Central, Cebu City.

“Possible talaga. They (Parojinog) have established friends in different areas. There are politicians nga na mga friends nila,” si Garma nagkanayon.

Nisamot ang pagduda ni Garma nga aduna gyuy bodega sa shabu sa Dakbayan sa Sugbo sanglit mahimong makabaligya ang mga pusher og dinaghan matag transaksyon.

Ang nahitabong operasyon follow-up gihimo sa Mandaue City Police Office Station 3 human giyagyag sa ilang dinakpan ang tulo nga maoy tinubdan sa shabu.

Walay nakita nga problema si Garma sa maong operasyon sanglit gitugot na sa kadagkuan sa Police Regional Office-7 nga mo-overlap sa laing area of responsibility ang kapolisan basta lang makig-coordinate sa kapolisan sa maong lugar.

Nangulo sa operasyon si Police Senior Inspector Rodgene Fudotan, hepe sa MCPO Police Station 3 ug mga sakop sa Drug Enforcement Unit.

Matud sa hepe nga napahigayon ang buy-bust human kanunay molugwa ang pangalan niini sa higayon nga adunay mga madakpan nga ilegalista.

Ang mga dinakpan tak-om sa dihang gikuhaan kini og mga pamahayag samtang gitanggong sa Presinto 3 sa MCPO.

Ang nasakmit nga drugas giingong maoy labing daku nga nasakmit karong tuiga.

Sa laing bahin, usa ka 46-anyos nga lalaki ang nadakpan human nakuhaan og P1.2 milyones nga balor sa drugas atol sa pagsilbi og search warrant sa Barangay Madridejos, Lungsod sa Alegria kagahapong adlawa.

Base sa report sa Alegria Police Station nga ang dinakpan mao si Francisco Gervano Ocaña, 46, residente sa maong lugar.

Drugas ang gipapangita sa maong warrant ug tuod man nakuha sa mga polis gikan kang Ocaña ang 110 ka gramong gituohang shabu.

Nakuha sab ang pipila ka gamit sa pag-repack og drugas ug usa ka kalibre .22 nga armas. (Rowena D. Capistrano ug Romeo T. Limpangog/GMR)(BANAT NEWS)