2 ka suspek sa pamanhig sa jail guards ug inmate gipangita

CEBU, Philippines – Gipangita na karon ang duha sa upat ka suspetsado sa pagpamanhig patay sa duha ka jail guard ug piniriso diha sa Barangay Kalunasan, Dakbayan sa Sugbo. Kini ang gibutyag ni Police Senior Superintendent Royina Garma, hepe sa Cebu City Police Office (CCPO).

Matud ni Garma nga base sa report ang nahisgutang duha ka suspetsado mga hitman nga nag-operate sa Probinsiya sa Sugbo.

Nunot niini, subayon usab nila ang nagsugo sa maong pagpamanhig ug lakip usab sa ilang gilantaw nga anggulo sa motibo sa krimen ang kabahin sa ilegal nga drugas. Gikataho nga usa ka drug personality ang inmate sa Cebu Provincial Rehabilitation and Detention Center nga si Jerryfer Perigrino.

Niadtong Septiyembre 13, 2018 gihatud sa duha ka jail guards nga sila si Jail Guard 1 Bernie Bayotas ug Jail Guard 1 Joel Teves si Perigrino alang sa court hearing niini dihang gibanhigan sila diha sa Barangay Kalunasan.

Sa laing bahin, gitanyag karon sa usa ka magpapatigayon sa Dakbayan sa Mandaue ang paghatag og P200 mil isip ganti ni bisan kinsa nga makatudlo sa mamumuno sa negosyante.

Kini ang gibutyag sa director sa Mandaue City Police Office Senior Superintendent Julian Entoma.

Ang insidente sa pagpusil patay kang Johnson Sy Chiaoco nahitabo niadtong Septiyembre 11, 2018 diha sa Dalan Hernan Cortes sa Barangay Cabancalan sa maong dakbayan dihang ang biktima paingon nang mosulod sa iyang establisamento.

Matud ni Entoma nga dunay ganti o wala paningkamutan nila ang paghatag og kasulbaran sa maong krimen sanglit ilaha man usab kining kaakohan. (Romeo T. Limpangog/BDB)(BANAT NEWS)