Ilegal nga lotto outlet gironda

CEBU, Philippines – Dili mominus 14 ka tawo nga nalambigit sa ilegal nga sugal o swertres ang gisikop sa National Bureau of Investigation (NBI-7) sa Lungsod sa Asturias ug Tuburan.

Sila nadakpan atol sa sunod-sunod nga operasyon sa NBI sa pipila ka collection ug betting stations sa mga barangay sa maong mga lungsod niadtong Septiyembre 14.

Ang mga dinakpan mga empleyado sa Peryahan ng Bayan ubos sa Global Tech Mobile Online nga gireklamo sa buhatan sa NBI tungod kay walay pagtugot sa Philippine Charity Sweepstakes Office (PCSO).

Ang nireklamo mao ang general manager sa PCSO Manila nga si Alexander Balutan subay sa reklamo sa Saturn Gaming Corporation, ang authorized agent corporation sa PCSO sa mga small town lottery sa Probinsiya sa Sugbo.

Matud ni Atty. Dominador Cimafranca, officer-in-charge sa NBI-7, nga nakaapekto sa awtorisadong operator ang pagtumaw sa mga ilegal nga nagpahigayon og lotto draw.

“With regards of the authorized agent operation, maalkansi sila kay ang ilang income, naa man silay certain kwarta for that month nga ilang bayran sa PCSO, so dili na nila maabot ang ilang quota income,” matud ni Cimafranca.

Ang NBI nipasaka og kaso batok ni Sandra Rojo, empleyado sa Global Tech ug laing 13 ka tawo. (/GMR)(BANAT NEWS)