Namaligya og kinawat nga motorsiklo sikop

CEBU, Philippines – Usa ka lalaki kinsa giingong namaligya og kinawat nga motorsiklo ang nasikop sa nilabay’ng adlaw diha sa Barangay Biasong, Dakbayan sa Talisay.

Kini human nga ang iyang gibaligyaan nakabantay nga kinawat ang maong motorsiklo.

Ang nasikop mao si Marvin Paran, 20-anyos, taga Purok Water Lilly, Barangay Tuyan, Siyudad sa Naga.

Ang biktima mao si Ryan Lumod, 30, taga Barangay Biasong, Siyudad sa Talisay.

Sa imbestigasyon sa kapolisan giingong giprenda ni Paran ang motorsiklo og P10 mil ngadto kang Lumod niadtong Biyernes tungod kay ang kwarta gamiton niya sa pagkamatay sa iyang amahan.

Apan pagkasunod adlaw nibalik si Paran ug nihangyo kang Lumod nga dugangan og P10 mil ang iyang prenda aron makagawas na ang patay’ng lawas sa iyang amahan gikan sa tambalanan.

Ug niadtong Martes sa hapon nibalik na usab si Paran ug gipadugangan og laing P6 mil ang prenda aron mabuhatan na og deed of sale tungod kay buot na lang niyang ibaligya ang iyang motorsiklo.

Apan dihang gipangayoan ni Lumod og ID si Paran photocopy lang sa iyang ID ang gihatag sa suspetsado ngadto sa biktima.

Si Lumod nasuko tungod kay naobserbahan niya nga adunay pinapasan ang dokumento sa motorsiklo ug giingong gikulata niini ni Paran.

Si Paran gitugyan ni Lumod ngadto sa mga tanod sa ilang barangay ug gitugyan usab kini sa mga tanod ngadto sa kapolisan.

Nasayran nga ang maong motorsiklo kinawat kinsa si Reymond Ardimer maoy tag-iya niini. (/BDB)(BANAT NEWS)