Padayong nangandam sa Ompong
CEBU, Philippines – Padayon ang gihimong pagpangandam sa nagkalainlaing ahensiya sa bagyong Ompong sama sa Bureau of Fire Protection-7 bisan dili kini direktang moigo sa Central Visayas.
Kini ang gitug-an ni Senior Inspector Arra Alfajaro, fire marshall sa Dakbayan sa Talisay ug nirepresentar sa BFP-7 atol sa pre-disaster risk assessment nga gipangulohan sa Office of the Civil Defense.
Matud ni Alfajaro nga aduna silay 1,419 ka personnel ug 51 ka officers ang naka-standby diin 179 ka fire trucks, lima ka ambulansiya ug duha ka rescue vehicles ang naka-standby nga mahimong magamit kung kinahanglanon dayon. Wala na usab silay gitugutan nga mga personnel nga maka-leave o kaha mo-absent tungod kay blue alert status sila.
Samtang gipahimangnuan ni Weather Specialist Engr. Oscar Tabada ang mga namuyo sa coastal area sa Siyudad sa Talisay labot sa bagyong Ompong.
Si Tabada ang nakigtagbo sa mga opisyal sa siyudad lakip na ang 22 ka kapitan.
Si Alvin Santillana, pangulo sa City Disaster Risk Reduction and Management Office (CDRMMO), nagkanayon nga dili lang ang coastal barangay ang mag-amping kun dili kadto sab ang mga namuyo duol sa sapa ug sa kabukiran.
Samtang si Supt. Marlu Conag, hepe sa kapolisan sa siyudad, nibutyag nga nag-agad siya kang Santillana kun angay ba ang ilang pwersa sa matag lugar nga ilang bisitahon aron sab sila makatabang sa bisan unsa nga mahitabo. (Gabriel C. Bonjoc/GMR)(BANAT NEWS)
Related video:
- Latest
