Negosyante gipusil sa parking lot
CEBU, Philippines – Namatay gyud sa tambalanan ang usa ka negosyante nga gipusil sa riding-in-tandem nga nag-bonnet sa atubangan sa iyang gipanag-iya nga hardware sa may dalan Hernan Cortes, Cabancalan, Dakbayan sa Mandaue alas 7 pasado kagahapon sa buntag.
Si Chief Inspector Zosimo Jabas Jr., hepe sa Presinto 4 sa Mandaue City Police Office, niila sa biktima nga si Johnson Sy Chiaoco, 56, taga Green Heights Subdivision, Lungsod sa Consolacion.
Matud ni Jabas nga ang biktima kinsa maoy tag-iya sa Mega Euro Star (Nippon) nga namaligya og hardware nga naglakip na sa mga pintal ang nanaug na gikan sa gi-parking niya nga sakyanan atubangan sa iyang establisemento.
Dihang nanaug ang biktima sa iyang sakyanan nahidangat usab ang wala hiilhing lalaki nga nag-bonnet ug kalit lang namusil sa biktima kausa lang sa walang bahin sa ulo niini samtang dali nga nisibat ang wala hiilhing mamumuno.
Ang biktima nga nahagba ang dali nga gitabang sa pipila ka tawo sa maong dapit ug gidala sa Chong Hua Hospital sa Dakbayan sa Mandaue apan gideklarar nga dead on arrival.
Si Police Inspector Lino Baylosis, deputy chief sa maong presinto niingon nga may hulga na ang biktima apan gibaliwala lang kini.
Gilantaw nila ni Baylosis karon kung may kalambigitan ba sa negosyo ug uban pa ang hulga nga nadawat sa biktima. (Rowena D. Capistrano/GMR)(BANAT NEWS)
- Latest