Osmeña nipugong sab sa dakung proyekto sa SRP

CEBU, Philippines — Gisumbalik ni Konsehal Joel Garganera pagpasangil si Cebu City Mayor Tomas Osmeña nga maoy unang nibabag sa dakung proyekto sa siyudad nga makahatag og trabaho sa liboan ka Sugbuanon.

Gipasabot ni Garganera ang consortium sa Ayala Land, Cebu Holding Inc. ug SM Prime Holdings nga nipalit og luna sa South Road Properties (SRP) nga gipakanselar ni Osmeña ang kontrata.

Nipadangat sa iyang privilege speech si Garganera niadtong Agosto 14 diin iyang gibanatan si Osmeña sa sige niining pasangil sa oposisyon sa konseho nga tigbabag sa iyang mga dagkung proyekto sama sa P18-billion nga development project sa Kawit Island. Matud ni Garganera nga gawas nga makahatag og daghang trabaho ang consortium, ang siyudad makakolekta sab og real property tax ug event taxes itandi sa UHRI Joint Venture Agreement diin ang siyudad makakuha lang og 10 porsyento sa ganansiya.

“If we are being condemned or even ridiculed in our stand and belief that the UHRI Joint Venture Agreement is disadvantageous to the City, then so be it. We are merely upholding our office in ensuring check and balance in the council and to look after the interests of our constituents,” matud ni Garganera. Niadtong 2015 ang siyudad nibaligya sa 45.2-hectare lot sa SRP nga nagkantidad og P16.7 bilyones sa tulo ka dagkung developer nga naghulma og consortium.

Apan si Osmeña nipakanselar sa kontrata tungod sa iya nakitang “fatal defects” sa pagbaligya sa SRP lot.

Pipila niini mao nga adunay resolusyon sa niaging konseho nga nagdili sa pagbaligya diin si kanhi mayor Michael Rama walay pagtugot sa pagpirma sa deed of sale ug ang konseho nipasar og resolusyon nga dili mopahigayon og public bidding ug uban pa.

Si Osmeña niingon sab nga wala’y ebidensiya nga ang mga dagkung developers niumol og consortium aron pagpalit sa luna sa SRP. Gumikan niini, si Garganera nihulagway kang Osmeña nga dili “visionary leader.” (/GMR)(BANATNEWS)