Mga layko nanawagan og hustisya sa mga gipamatay

CEBU, Philippines — Dul-an sa 1,000 ka layko ang nitambong sa monthly lay caucus kagahapon sa buntag nga gipahigayon diha sulod sa International Convention Center (ICC).

Gibuksan sa usa ka praise and worship sa alas 9:00 sa buntag ug gisundan kini sa pagpasabot sa topic kalabutan sa spiritual warfare. Lakip sa maong kalihukan ang pag-ampo alang sa tanang mga kalag nga gipamatay pinaagi sa usa ka candle lighting ug pag-awit sa pahulay nga dayon ug lakip ang paglusad sa pag-ampo sa Oratio Imperata nga madunggan sa tanang simbahan nga ampuon karong adlawa matag human sa kalawat.

Human sa pag-ampo alang sa mga biktima sa pagpamatay ug paglusad sa Oratio Imperata gipadayag dayon ang manifesto.

Base sa manifesto giila nila ang drugas nga dakong problema ug hulga sa katilingban ug sila  mosuporta ug mobulig sa tanang mga paningkamot nga mapuo kini pinasubay sa balaod ug supak sila sa pagpatay ubos sa bayolente nga pamaagi aron lang masumpo ang suliran sa drugas.

Pinaagi sa manifesto nanawagan sila sa otoridad sa pagpahigayon og imbestigasyon sa mga insidente sa pagpamatay aron mahatagan og hustisya ang mga biktima ug mataral ang mga tawo nga naghimo ug nagpaluyo niini.

Matud pa ni Fe Barino, pangulo sa commission on the laity nga tumong nila sa paggama og manifesto aron makadungog ang katawhan ilabi na ang pangagamhanan nga nagpakabana ang mga layko diin pinaagi sa dakong pagtuo sa Ginoo makab-ot ang kasulbaran sa tanan.

Ang maong kalihukan sa lay caucus gitapos sa usa ka pagpirma sa manifesto nga sila nagasuporta niini.

Dugang ni Barino nga mag-ampo siya alang kang Presidente Rodrigo Duterte nga magiyahan kini sa balaan nga espiritu sa pagdumala niini sa nasud nga matarong bisan sa kadaghang problema nga giatubang. (/BDB)(BANATNEWS)