P4.2 bilyon na nakolekta sa siyudad sa sugbo

CEBU, Philippines – Sulod sa pito ka buwan, ang Cebu City Treasurer’s Office nakakolekta na og P4.2-billion revenue gumikan sa paghingusog nila sa ilang koleksiyon sa business tax, real property tax ug uban pang bayranan.

Kini base sa record gikan sa buwan sa Enero hangtud Hulyo niining tuiga diin duol-duol na sa P6.1-billion nga target karong tuiga.

Nagkanayon si acting City Treasurer Veronica Morelos nga ang padayon nga paggukod ni Mayor Tomas Osmeña batok sa mga business establishments nga wala nagbayad og buhis sa siyudad ang daku og natabang.

“Daku kay na og ikatabang kay ngano nangahadlok sila bisan og wala pa maagi sa atong inspector nangari kay molukat na sila sa ilang unsa na, molukat na sa ilang business permit or mamayad na sa ilang mga buhis,” matud ni Morelos.

Ang siyudad nakakolekta og P3.8-billion sa susamang period sa niaging tuig.

Kahinumduman nga dunay 33,000 ka business establishments ang narehistro sa siyudad niadtong Marso apan matud ni Morelos naa lang sa 30,000 niini ang ni-renew sa ilang permits.

Matud ni Morelos nga ang ilang buhatan nagpakatap og mga inspectors sa matag barangay sa siyudad aron mosusi niadtong mga business establishments nga nag-operate nga walay business permit.

Nidugang kini nga ang tax mapping sa matag sitio sa barangay nakatabang gyud sa pag-umento sa koleksiyon.

“Ato sad gipang-ukay nang mga wala mang-renew, mga delinquent bali ba, wa mang-renew, atong gipang-extract nato, nya ato silang gipaninglan, gipadad-an nato og demand letters unya sa real property tax the same thing sa atong gihimo,” matud ni Morelos.

Nagkanayon sab kini nga ang ilang buhatan mopublikar sa listahan niadtong mga delinquent tax payers kun mahuman na nila og tapok sa report.

Nunot niini si Morelos niingon nga masaligon siya nga makuha og molapas pa sa P6.1-billion target karong tuiga.

Aron makab-ot kini, ang tax mapping sa siyudad ipahigayon dungan sa pagbutyag nga ilang iduso kadtong mga masalaypon nga patigayon sa City Legal Office alang sa demand letters. (/GMR)(BANAT NEWS)