Retiradong polis gipatay

CEBU, Philippines – Patay ang usa ka retiradong sakop sa Lapu-Lapu City Police Office (LLCPO) nga gipusil sa riding-in-tandem sa M.L.  Quezon Highway, dapit sa tiilan sa Marcelo Fernan  Bridge sa Barangay Pusok sa Dakbayan sa Lapu-Lapu sa miaging kaadlawon.

Si Senior Superintendent Lemuel Obon, hepe sa LCPO miila sa namatay nga mao si kanhi Senior Police Officer 2 Wilfredo Amores, 56, taga Barangay Marigondon sa maong dakbayan nga sakop sa LCPO apan miretiro kini niadtong Marso niining tuiga.

Nagsakay og motorsiklo si  Amores gikan sa Yacht Club and Casino sa Barangay Buaya kauban ang usa ka babaye.

Giingong gisundan sila og duha ka tawong nagmotor  ug pag-abot sa maong dapit kalit kining gipusil sa ulo ug uban pang bahin sa iyang lawas.

Ang angkas nga babaye kansang pangalan wala ibutyag nakabaton og ginagmay nga bun-og ug pangus sa lawas.

Si Amores katapusang nadestino ang Presinto 3 apan niadtong Marso niining tuiga miretiro kini.

Usa ka task force ang gimugna aron tutokan ang imbestigasyon. Matud pa ni Obon maayo sa trabaho si Amores kinsa kanhi hepe sa Thief and Robbery Section sa LLCPO.

Matud niya way kalabutan sa illegal drugs ang pagkamatay ni Amores ug wala usab kini sa ilang listahan.

Dako ang pagtuo ni Obon nga tulis ang tuyo sa mga mamumuno kay base sa kuha sa CCTV camera gikuha gyud sa gunman ang bag ni Amores nga gituohang adunay sulod nga kwarta kay nakadaug kini sa casino anang gabhiuna.

Sumala pang Obon, ang mga kanhi kauban ni Amores nibutyag nga adunay nadawat nga hulga ang kanhi polis.

Sa laing pagpamusil, patay ang anak sa retiradong polis diha sa Guadalupe Osmeña Village, Barangay Punta Princesa, Cebu City niadtong Miyerkules sa gabii.

Ang biktima mao si Alvin Abella alyas Burgo, nagpuyo sa Doña Maria Village 2, sa maong barangay ug anak sa retiradong polis nga si Senior Police Officer 4 Venancio Abella.

Si Police Chief Inspector Clark Arriola, hepe sa maong estasyonan miingon sa Banat News nga mopauli na sa ilaha ang biktima dihang gipusil sa wa pa mailhing mamumuno.

Matud pa nga sa miaging semana nakakita og away ang biktima ug ilaha kini karong gisubay. (Romeo Limpangog ug Rowena Capistrano/IBM)(BANAT NEWS)