CIDG, HPG gihatagan og luna sa Kapitolyo

CEBU, Philippines — Aduna nay katukuran sa bag-ong buhatan ang duha ka unit sa Philippine National Police sa Central Visayas human gihatag sa Probinsiya sa Sugbo ang duha ka luna nga gipanag-iya niini.

Ang Criminal Investigation and Detection Group (CIDG-7) ug Highway Patrol Group (HPG-7) pareho kining nakadawat sa maong luna gikan sa Kapitolyo.

Ang unang luna nga adunay 679 metro kwadrado nga gidak-on gihatag ngadto sa CIDG-7 samtang samang gidak-on ang gihatag sab ngadto sa HPG-7 nga anaa nahimutang sulod sa Campo Sotero Cabahug sa Dakbayan sa Sugbo.

Matud ni Gobernador Hilario Davide III nga ang paghatag sa Kapitolyo ngadto sa HPG-7 ug CIDG-7 pagpakita og suporta ngadto sa kapolisan ug pagsalig kanila nga ipadayon ang mandato pagpanalipod sa katawhan.

“They approached us and we willingly accepted their request to donate a portion of the property nato diha sa Camp Sotero Cabahug,” matud ni Davide.

Si Chief Superintendent Roberto Fajardo, director sa HPG-7, nagpasalamat sa Kapitolyo sa paghatag sa maong luna diin ilang itukod ang duha ka andana nga building.

Matud ni Davide nga ubos sa kasabutan, kinahanglan nga ang duha ka buhatan sa PNP magamit niini ang gihatag nga luna sulod sa duha ka tuig aron dili kini bawion sa Kapitolyo. (BANAT NEWS)