Mosyon ni Garcia gibasura
CEBU, Philippines — Gibasura sa Office of the Ombudsman ang motion for reconsideration ug ingon man ang supplemental motion for reconsideration ni kanhi gobernadora ug karon 3rd District Representative Gwendolyn Garcia kalabot sa kontrobersiyal nga Balili Property nga walay pagtugot gikan sa hunta probinsyal.
Si Garcia nagatubang og grave misconduct ug gross neglect of duty sa Office of the Ombudsman kon diin unang nidesisyon ang anti-graft body nga siya tangtangon sa serbisyo.
Ang maong kaso gipasaka kaniadto ni Gob. Hilario Davide III, Bise Gob. Agnes Magpale ug anhing bokal Arleigh Sitoy.
Sa mosyon ni Garcia, siya miingon nga nasayop ang Ombudsman sa dihang wala niini gi-apply ang condonation doctrine sa iyang kaso. Matud ni Garcia nga wala usab otoridad ang Ombudsman sa mga miyembro sa Kongreso.
Apan sa 11-pahina nga desisyon gipagawas Ombudsman penetsahan Hulyo 18, 2018, nagkanayon nga dili ma-apply sa kaso ni Garcia ang condonation doctrine.
Ang condonation doctrine nagsaysay nga ang usa ka elected nga opisyal mapasaylo sa kaso kon siya mapili balik sa parehong posisyon pinaagi sa eleksyon.
Apan matud sa Ombudsman nga nakadaog man tuod si Garcia apan dili na sa pagka gobernador sa lalawigan ug ang kaso nasang-at di pa siya kongresista.
“This Office, however, finds that the body politic that elected her as representative as not the same as those who voted her previously as Cebu governor,” pagsaysay sa desisyon.
Apan si Garcia nagkanayon nga “political persecution” ang gihimo kaniya sanglit nipadayag man siya nga modagan pagka gobernador sa lalawigan sunod eleksyon.
Matud ni Garcia nga iya na kining gipaabot nga gukdon siya sa Ombudsman sanglit suod nga higala si retired Ombudsman Conchita Carpio Morales ug ang amahan ni Davide nga si kanhi Chief Justice Hilario Davide Jr. (BANAT NEWS)
- Latest
