Arum nakigtagbo ni Pacquiao

CEBU, Philippines — Luwan sa usa ka pribadong abyon, si Top Rank chairman Bob Arum milupad didto sa   General Santos City niadtong Biyernes sa gabii aron makigtagbo ni WBA welterweight champion Manny Pacquiao ug sutaon kon unsay ugma nga nagpaabot tali nilang duha.

Ang relasyon sa duha nagsugod og kaaslom human si Pacquiao napilde ni Jeff Horn niadtong Hulyo sa miaging tuig.

Bisan si Pacquiao maoy ni-promote sa kaugalingon niyang away batok ni Lucas Matthysse didto sa Kuala Lumpur niadtong Hulyo 15 inabagan sa Golden Boy Promotions, wala niya putla ang ilang koneksiyon ni Arum.

Timaan niini, iyang gipiyalan ang Top Rank nga maoy mopasalida sa iyang away batok ni Matthysse didto sa Amerika.

Gipaabot nga daghang matang ang tukion ni Arum uban ni Pacquiao, nga mipahibawo sa miaging bulan nga ang MP Promotions na maoy mohimo og negosasyon sa sunod niyang away.

Gusto ni Arum nga direktang madungog gikan mismo sa baba ni Pacquiao kon unsa iyang papel ning puntoha sa karera sa Pinoy ring star.

Human gipatikangkang si Matthysse sa ikapitong hugna, si Pacquiao mipadayag nga gusto siyang mobalik og away karong Disyembre.

Gisaytan isip iyang mga kontra mao sila si WBA lightweight champion Vasyl Lomachenko ug WBO welterweight champion Terence Crawford nga pulos mga boksidor ni Arum.

Tataw nga mahitabo lamang ang maong away kon magkasinabot silang duha si Arum ug Pacquiao.