Mga estudyante gi-edukar sa epekto sa ginadiling drugas

CEBU, Philippines – Ang Police Community Relation (PCR) sa Mandaue City Police Office (MCPO) nagpadayon karon sa ilang pagsabwag og mga kasayuran ngadto sa mga tinun-an sa Grade 3 ngadto sa Grade 6 uban usab sa mga junior ug senior high school gikan sa publiko ug mga pribadong tulunghaan sa Dakbayan sa Mandaue.

Uban  usab sa gipahigayong kalihukan ang Women and Children Protection Desk (WCPD) ug City Mobile Force Company sa MCPO.

Ang seminar nga ilang gipasiugdahan naghatag og tukmang kasayuran sa maong mga tinun-an labot sa mga dautang epekto sa paggamit sa ilegal nga drugas nga moresulta usab sa nagkadaiyang krimen.

Ang mga tinun-an sa University of the Visayas-Mandaue ang nitambong usab sa maong seminar diin sila mao ang unang gibisita sa kapolisan.

Gawas sa ginadiling drugas, lakip sa gipahigayong kalihukan ang kabahin sa kampaniya batok sa fraternity, bullying ug pornography.

Si Inspector Mercy Villaro, tigpamaba sa  MCPO  mituki usab sa gihingusgan nilang pagpanalipod sa mga tawhanong katungod  sa kabataan  ug ingon ang paghatag og mga giya sa angay nilang buhaton kon makasinati man ugaling kini  sa child abuse, human trafficking, sexual harassment, pagpanglugos ug uban pang krimen. (/BDB)(BANAT NEWS)