Magsuong tinun-an sa criminology nag-shabu

CEBU, Philippines – Siyam ka durugista lakip na ang magsuong criminology student ang nasikop sa managlahing lugar sa Dakbayan sa Talisay sa mga operatiba niadtong Miyerkules.

Alas 12:30 sa udto sa Sitio Mananga 1, Barangay Tabunok naatlan sa mga operatiba nga nanuyop ang duha ka magsuong criminology students nga sila si Phillip James Labao, 19, ug Joseph Labao, 27, nga taga Siyudad sa Naga ug sila si Ely Cabusas, 48, ug Dionisio Cadilig Jr., 46, taga Lungsod sa Minglanilla. Nakuhaan sila og pito ka gagmay nga pakete sa shabu ug mga drug paraphernalia.

Gisulod sa mga operatiba ang Barangay Tangke alas 2:30 sa hapon diin naghimo sila og checkpoint hangtud nga ilang nasita ang nagmotorsiklo nga mga lalaki.

Nasikop mao sila si Rackieboy Juarez, 24, ug si Edric Gemina, 24, pulos taga Dakbayan sa Toledo, kinsa nisuway sa pag-ikyas apan dali ra sab nasikop ug nakit-an nga adunay upat ka gagmay nga pakete sa shabu nga gilabay.

Nibalik sa Sitio Mananga 1 ang operatiba ug gihimo ang buy-bust operation kang Julius Deiparine, 34, kinsa nakuhaan og usa ka medium ug 12 ka        gagmay nga pakete sa shabu.

Samtang alas 11:45 sa gabii nisulod na sab sa Barangay Candulawan ang operatiba diin nasikop sila si Alberto Romagos, 20, ug Ronald Padigos, 21, pulos nagpuyo sa maong dapit, kinsa nakuhaan og drug paraphernalia ingon man shabu.

Sa laing bahin, ang anggulo sa kalambigitan sa ilegal nga drugas ang gisubay sa mga imbestigador sa Mandaue City Police Office (MCPO) sa tulo ka sunod-sunod nga pagpamusil nga nikalas sa kinabuhi sa usa ka nagbantay sa internet café ug niangol sab sa vulcanizing shop attendant ug usa ka babaye sumala pa ni MCPO director, Senior Supt. Julian Entoma. (Romeo T. Limpangog/GMR)(BANAT NEWS)