Drayber gikasohan sa NBI

CEBU, Philippines — Gipasakaan na og kaso sa National Bureau of Investigation (NBI-7) ang driver ni Tejero konsehal Jessilou Cadungog kinsa maoy nipusil kang PO3 Eugene Alain Calumba didto sa T. Padilla Extension corner Alviola Street, Barangay Tejero niadtong Lunes sa buntag.

Si William Macaslang nag-atubang karon og kasong homicide sa Cebu City Prosecutor’s Office. Siya gipaubos sa inquest proceedings kagahapon sa sala ni Maria Theresa Casiño ang assistant city prosecutor. Atol sa filing, niadto usab ang mga taga Criminal Investigation and Detection Group (CIDG)-7 pinangulohan ni Chief Inspector Hector Amancia kinsa mipahibalo nga kasohan nila si Macaslang.

Samtang si Sr. Inspector Jomar Pomarejos, hepe sa Waterfront Police Station nagkanayon nga mopasaka usab sila og kasong murder batok  ni Cadungog ug Macaslang karong adlawa.

Matud ni Pomarejos nga apil si Cadungog sa ilang kasohan tungod adunay “conspiracy” sa maong hitabo ug miinsister siya nga kuyog gyud si Cadungog ni Macaslang atol sa pagpamusil.

Si Cadungog daan nang namahayag nga wa siya sa iyang sakyanan pagkahitabo kay nanaog siya sa barangay hall ug si Macaslang lang iyang gisugo  nga patubilan ang sakyanan ug diha na nahitabo ang pagpamusil.

Si Macaslang niadtong Lunes nangangkon nga nag-inusara siya sud sa sakyanan padung mopatubil dihang nakabantay kini og duha ka lalaking nagmotor nga nagsige og dutdot ug gustong mo-overtake kaniya, hangtud nga nakabantay kini nga nibunot sila og armas. Tungod kay gibilin man ni Cadungog ang armas niini diha sa sakyanan giunhan niya sila pagpusil.

Adunay mga mitumaw nga pagduda ug bisan si Cebu City Mayor Tomas Osmeña nagduda nga nalambigit ang kapolisan niining mga pagpatay nga nahitabo dinhi sa dakbayan.

Apan ang tigpamaba sa Police Regional Office-7 nga si Supt. Reyman Tolentin mihimakak niini.

“Well that’s his view. We just have to prove it otherwise,” tubag pa sa maong tigpamaba kabahin sa pamahayag ni  Osmeña nga posibleng adunay kalabutan ang kapolisan sa sunod-sunod nga patay sa Sugbo. Si Calumba matud pang Tolentin maayo nga polis ug nagbangotan sila sa kamatayon niini.

Sa social media post ni Cebu City Councilor ug Deputy Mayor for Police matters Dave Tumulak mipakita sa mga tattoo nila ni Calumba ug sa nadakpang drayber niini sa motor nga si Michael Banua. Ang duha parehong adunay tattoo nga bar code sa ilang mga tuo nga pulso.

Pipila ka mga netizens ang nikomento nga posibleng sakop sa usa ka dakong grupo ang duha, apan gihimakak gyud kini sa kapolisan.

“It’s a personal expression. Depends on how you interpret it. It does not connotes anything kung bad guy ka or good guy,” pagpasabot pa ni Tolentin.

Sumala pa niya si Calumba nakadawat na og daghang medalya ug pasidungog sud sa napulo ka tuig. Marso ning tuiga nabalhin sa Cebu Provincial Police Office ug pag Abril naapil siya sa mga gipuli sa 39 ka mga girelibohang polis sa Pari-an Police Station.

Ang hepe sa Pari-an Police Station nga si Police Chief Inspector Kenneth Paul Albotra miingon nga lehitimong surveillance operation ang giadto ni Calumba isip sakop sa Drug Enforcement Unit sa ilang estasyonan.

Si Amancia sa CIDG-7 sa phone interview mipasalig nga ‘fair and balance’ ang pagahimuon nilang imbestigasyon sa maong kaso.

Ang asawa ni Calumba nga si Rose Marie Calumba dili pa makatoo nga wala na ang iyang bana. Gihulagway niya kini nga buotan nga bana ug responsableng amahan sa ilang mga anak. Bugtong niyang gipangayo nga mahatagan kini og hustisya. (Camille Pateres ug Rowena Capistrano/IBM) (BANAT NEWS)