500 ka job vacancies alang sa PWDs
CEBU, Philippines – Niabot ngadto sa 50 ka Persons with Disability (PWD) ang nangaply atol sa gipahigayong ika-11 ka tuig na nga local job fair alang sa mga PWD nga gipasiugdahan sa Department of Manpower Development Placement (DMDP).
Kapin sa 500 ka job vacancies ang gihalad alang sa mga PWDs isip gasa sa Lokal nga Kagamhanan sa National Disability and Prevention Week nga mahitabo matag tulo ka semana sa bulan sa Hulyo.
Ubos sa DMDP, ang maong job fair usa ka institutionalized nga programa nga giandam aron mahatagan og higayon ang mga PWD nga makatrabaho.
Matud pa ni Fidel Magno, head sa DMDP nga usa ka porsiyento sa workforce gagikan gyud sa PWD. Ang Department of Labor and Employment (DOLE), Department of Social Welfare and Development (DSWD) ug Area Vocational Rehabilitation Center II (AVRC) ang misuporta usab sa maong kalihukan.
Si Magno nagkanayon nga ang Siyudad sa Sugbo usa ka “City Friendly to PWD” diin gi-manifesto ni Cebu City Mayor Tomas Osmeña nga iprayoridad ang mga PWD.
Lakip sa mga kompaniya nga nihatag og kahigayonan sa mga PWD isip usa sa ilang staff workers, factory workers, janitorial ug masahista gilangkuban sa Convergys, Tech Mahindra, Cebu General Services Inc., MCRI Global Corp.
Ang Cebu City Government ug ang DMDP mipahibalo nga abli sila matag adlaw alang sa mga PWD nga adunay panginahanglan sa trabaho. (/BDB)(BANAT NEWS)
- Latest
