Magpale uyon sa pahimangno paglikay sa rape
CEBU, Philippines – Kung ang uban nisaway sa gipagawas nga pahimangno sa Angono Police sa Probinsiya sa Rizal kalabot sa paglikay nga ma-rape, si Bise Gobernador Agnes Magpale walay nakita nga problema niini.
Ang Angono Police nipagawas og napulo ka pahimangno aron makalikay nga ma-rape diin usa sa gibutang nga pahimangno ang dili pagsul-ob og seksi nga shorts ug dili moinom og ilimnong makahubog kung makig-date.
"Huwag magsuot ng maiigsing damit," usa sa mga pahimangno.
Nunot niini pipila sa mga netizens ug women rights advocates ang wala makauyon sa maong pahimangno ug daw ang biktima na hinoon sa pagpanglugos ang mabasol.
“We are correcting the Angono PNP: Wearing short skirts does not cause rape. Getting drunk does not cause rape. Rapists do cause rape. The misogynist exhortations by the president do cause rape,” sumala pa sa Gabriela Women’s Party.
Tungod niini nangayo og pasaylo ang Angono Police ug nitataw nga ang intensyon lang sa maong pahimangno mao nga makalikay ang mga tawo ilabi na ang kababayen-an nga malugos.
Apan si Magpale kinsa maoy chairman sa Provincial Women's Commission nagkanayon nga nakasabot siya sa sentimento sa mga women rights advocates apan sumala pa niya nga pipila sa kaso sa rape tungod kay natintal ang suspek tungod sa kamubo sa gisul-ob sa biktima.
"You know I agree, that you should properly dress. We have all the best of intention nga wala nay ingon ana (mang-rape) pero mo-agree ako pud nga influence, so kana pud, don’t tempt,” matud ni Magpale. (/GMR)(BANAT NEWS)
- Latest